· Na vía que une Cangas coa glorieta de Gandarío, canalizarase unha escorrentía superficial que causou danos na calzada.

· O proxecto tamén inclúe a reposición das redes de saneamento e abastecemento afectadas en Cangas, así como a reparación do firme no lugar de Curros (Cortiñán).

O Concello de Bergondo acaba de sacar a licitación un proxecto para reparar os danos no firme detectados en dous puntos da rede viaria municipal. A actuación, que conta cun orzamento de 66.528,04 euros financiados a través do remanente de tesourería municipal, centrarase en solucionar un afundimento na estrada que une Cangas coa glorieta de Gandarío, e en reparar outra incidencia deste tipo no lugar de Curros, na parroquia de Cortiñán.

No caso de Cangas, o afundimento do firme está provocado polo paso dunha escorrentía superficial que verte no Rego de Gandarío e que cruza baixo a vía municipal. Para atallar o problema de raíz e protexer a estrutura da estrada, o proxecto contempla a canalización destas augas ao longo de 64 metros mediante un novo tubo de formigón de 800 milímetros de diámetro, incluíndo a execución dos emboquilles, arquetas e pozos de rexistro necesarios para conectala á rede de pluviais.

As obras requirirán tamén repoñer os servizos afectados. Así, renovarase a rede de saneamento adaptando o seu trazado nun tramo de 56 metros con novas tubaxes e pozos, e repoñeranse las catro acometidas existentes. De igual modo, aproveitarase a intervención para renovar a rede de abastecemento na zona de actuación. Unha vez finalizados estes traballos, procederase á reposición completa do firme afectado en Cangas.

O proxecto complétase cunha actuación idéntica prevista no lugar de Curros (Cortiñán), onde se reparará un tramo de estrada que sufriu un afundimento.