Sandra Permuy mantivo un encontro co vicepresidente provincial, Xosé Regueira, e coa deputada Cristina García para informar da situación da infraestrutura que abastece a varios concellos da comarca

O Concello considera prioritario reparar as perdas na rede e reclama a implicación das administracións competentes antes de establecer calquera reparto do custo da actuación

A alcaldesa de Fene, Sandra Permuy, mantivo unha xuntanza co vicepresidente da Deputación da Coruña, Xosé Regueira, e coa deputada de Plans Provinciais, Cristina García, para trasladarlles a situación do sistema de abastecemento de auga da comarca e, en particular, a problemática existente na condución da Ponte das Pías.

O encontro prodúcese nun contexto marcado pola situación de seca deste ano e polo descenso das reservas do encoro das Forcadas, do que depende o abastecemento de Fene e doutros municipios da comarca. A menor dispoñibilidade de recursos hídricos volve poñer o foco sobre o estado das infraestruturas de distribución e sobre a necesidade de reducir as perdas existentes na rede.

Un dos principais puntos de preocupación atópase na condución da Ponte das Pías, unha infraestrutura afectada polo paso do tempo e na que existe unha fuga pola que se estima unha perda diaria de arredor de 1.000 metros cúbicos de auga.

A alcaldesa trasladou aos representantes provinciais a información da que dispón o Concello de Fene e a necesidade de abordar esta situación desde a coordinación institucional e con criterios técnicos, especialmente nun momento no que resulta fundamental evitar perdas innecesarias de auga.

“Nun escenario de escaseza como o actual, unha perda desta magnitude é unha cuestión que debe preocuparnos a todas as administracións. O primeiro debe ser actuar sobre a infraestrutura, reducir as fugas e garantir un sistema de abastecemento seguro e eficiente para a cidadanía”, afirmou Sandra Permuy.

Fene pide claridade sobre as responsabilidades

O pleno da Mancomunidade de Concellos da Comarca de Ferrol abordou nas últimas semanas a posibilidade de acometer a reparación da infraestrutura mediante unha fórmula de financiamento na que participarían Augas de Galiza, os concellos e a Deputación da Coruña.

Ante esta proposta, a alcaldesa considerou necesario trasladar directamente a situación á institución provincial. O Concello de Fene sinala que non se pode dar por feita a participación económica dunha administración sen que exista previamente unha interlocución e unha análise das condicións da actuación.

Permuy defende ademais que calquera proposta debe partir dunha delimitación clara das competencias e responsabilidades sobre a infraestrutura. A condución é de titularidade do Concello de Ferrol, polo que desde Fene consideran que esta circunstancia debe ser tida en conta á hora de determinar quen debe acometer e financiar as actuacións necesarias para a súa conservación.

“Fene está disposto a falar e a colaborar na procura de solucións porque estamos ante unha infraestrutura esencial para a comarca, pero debemos facelo con rigor. Antes de falar de repartir custos hai que determinar con claridade a titularidade, as obrigas de conservación e as responsabilidades de cada administración e da empresa encargada da xestión”, sinalou a alcaldesa.

Permuy incidiu en que “a preocupación da veciñanza polo abastecemento é perfectamente comprensible, máis aínda coa situación actual das reservas, e precisamente por iso debemos ofrecer información clara e solucións fundamentadas, evitando trasladar responsabilidades sen que exista previamente un acordo entre as administracións implicadas”.

Reclamación a Augas de Galiza

O Concello de Fene reclama tamén unha maior implicación de Augas de Galiza nas necesidades relacionadas co ciclo da auga no municipio.

Desde o Goberno municipal lembran que a veciñanza aboa o correspondente canon da auga, un tributo autonómico de carácter finalista cuxa recadación está destinada a programas relacionados, entre outras cuestións, co abastecemento, o saneamento, a depuración e a protección e xestión do medio hídrico.

Neste sentido, Sandra Permuy sinalou que “desde Fene levamos tempo trasladando necesidades relacionadas co ciclo da auga e entendemos que é razoable reclamar unha maior implicación de Augas de Galiza nas actuacións que afectan ao noso municipio”.

“Se existe un canon especificamente vinculado á política da auga, é lóxico que reclamemos que esa recadación se traduza tamén en investimentos que permitan mellorar as infraestruturas e afrontar os problemas existentes”, apuntou.

Cooperación para garantir o abastecemento

Na reunión coa Deputación, a alcaldesa compartiu a preocupación pola situación actual e trasladou a necesidade de que calquera solución se articule desde a cooperación, a información entre administracións e o respecto ás competencias e responsabilidades de cada unha.

O Concello considera que o contexto de seca fai aínda máis necesario actuar sobre as perdas existentes e planificar as melloras que precise o sistema de abastecemento, pero entende que estas decisións deben adoptarse sobre unha base técnica e administrativa clara.

“O abastecemento de auga é un servizo esencial e require planificación a longo prazo. A prioridade debe ser garantir o recurso, conservar correctamente as infraestruturas e evitar perdas. Desde Fene seguiremos participando nos espazos de coordinación necesarios, defendendo ao mesmo tempo que cada administración asuma as responsabilidades que lle correspondan”, concluíu Sandra Permuy.