A oficina de turismo de Neda despide a tempada tras recibir ao redor de 3.000 visitantes

A Oficina de Turismo de Neda pecha temporada este xoves. Dende o arranque do verán botaron man deste servizo municipal preto de 3.000 persoas. A localización da caseta de información, á beira do albergue de peregrinos, fixo que a maioría dos usuarios e usuarias foran romeiros que percorren o Camiño Inglés.

Segundo apuntan dende a oficina, activada en xuño co apoio da Deputación da Coruña, durante o período de actividade achegáronse por este punto de información e recepción de visitantes un total 2.933 persoas, o 42% eran turistas internacionais (italianos, alemáns e británicos, por esta orde).
O groso das persoas atendidas foron peregrinos que optaron por finalizar en Neda a primeira etapa do itinerario xacobeo que parte do ferrolán porto de Curuxeiras. Así, ata 2.052 persoas que se achegaron á caseta fixeron noite na instalación turística anexa. De feito, a coordinación do albergue, propiedade da Sociedade de Xestión do Xacobeo, pero xestionada aínda actualmente polo Concello, foi unha das misións que asumiron as técnicas de turismo.

De xeito xeral, as principais consultas que atenderon tiveron que ver coa hostalería local e cos recursos turísticos da localidade, destacando principalmente a fervenza do Belelle, o casco histórico, e tamén o emblemático pan de Neda. E a isto hai que engadir, claro está, as consultas relativas ao propio Camiño de Santiago. Os meses de maior actividade foron, nesta orde, agosto, xullo e setembro. E destacou pola afluencia a fin de semana da Festa do Pan.

Ademais de mellorar a información en destino, a activación do servizo permitiu levar a cabo accións de promoción en citas turísticas como Primavera no Camiño Inglés ou Equiocio Ferrol, eventos nos que se promocionou a citada festa gastronómica e máis a ruta a Compostela ao seu paso pola vila.