A Coruña será o punto de partida do Rally Rías Altas de vehículos históricos, con 77 equipos participantes

A saída da proba será este venres 1 na praza de María Pita a partir das 18.00 horas

A Coruña e a súa praza de María Pita serán o punto de partida e de chegada dunha nova edición do Rally Rías Altas de vehículos históricos, que terá lugar este venres 1 e sábado 2, con catro tramos diferentes polos concellos da comarca que se percorrerán en dúas ocasións, conformando un total de máis de 100 quilómetros. O Concello colabora na organización desta proba e no seu desenvolvemento na cidade, que será a base e desde onde sairán, de maneira neutralizada, os vehículos.

Nesta ocasión haberá un total de 77 equipos participantes das categorías de velocidade e regularidade. A proba será puntuable para o Campionato de España de Rallys de Vehículos Históricos, sendo a última cita desta edición. Por tanto, os pilotos loitarán polos títulos do ano.

A cerimonia de saída levarase a cabo este venres 1 na praza de María Pita a partir das 18.00 horas. Previamente, no paseo do Parrote, realizaránselle as verificacións técnicas aos vehículos desde as 10.30 horas. O final do rally será novamente na praza de María Pita, o sábado ás 20.30 horas, coa cerimonia de entrega de premios e trofeos.

O Rally Rías Altas de vehículos históricos naceu no ano 2015, sendo esta a décima edición. A proba tivo sempre a súa base na cidade para percorrer o golfo Ártabro, con gran tradición neste tipo de competicións. Nesta edición, o rally pasará por Monfero, Paderne, Aranga e Irixoa.