O Concello de Ortigueira rexistra un superávit de 1,1 millóns de euros en 2023

• O goberno local aprobou hoxe no pleno a conta xeral do 2023, un exercicio marcado pola responsabilidade e a eficiencia do goberno local.

• O aumento en ingresos logrouse, en gran parte, grazas a unha xestión activa de captación de subvencións doutras administracións, o que permite o gasto controlado sen a perda de calidade nos servizos públicos.

O goberno local de Ortigueira aprobou hoxe no pleno -celebrado ás 9:00 horas- os resultados económicos do exercicio 2023, nos que destaca un notable superávit que apoia a xestión financeira e administrativa realizada polo equipo liderado polo actual rexedor, Valentín Calvín. Cun resultado neto do exercicio de 1.159.230,26 euros, o balance final reflicte un ano de estabilidade e prudencia no uso dos recursos públicos.

O aumento nos ingresos, que ascenden a un total de 8.214.580,85 euros (máis dun millón de euros máis que no último exercicio), logrouse en gran parte grazas a unha xestión activa de captación de subvencións, que supuxeron un incremento na achega para gastos e transferencias ata alcanzar os 4.926.522,46 euros, un avance importante respecto ao ano anterior. Cabe destacar que o aumento na recadación de impostos e taxas apenas creceu respecto ao 2022.
“A nosa administración demostrou que é posible avanzar cara a unha Ortigueira máis próspera e con maior estabilidade financeira. Estes resultados son o reflexo dun compromiso claro coa responsabilidade e o desenvolvemento sostible do noso municipio, deixando atrás anos de dispendio e descontrol a nivel económico”, afirmou o alcalde Valentín Calvín. “É un logro de todos os veciños e veciñas, e do equipo que traballa día a día para xestionar cada recurso de forma eficiente”.

En canto aos gastos, a contención e optimización foron clave, situándose en 7.265.194,44 euros, un incremento controlado respecto a 2022. Os principais rubros foron os gastos de persoal, que ascenden a 3.482.951,64 euros, e as subministracións e servizos, que se cubriron cun gasto de 3.654.157,86 euros. En contraste, os gastos financeiros foron mínimos, con apenas 17.057,92 euros destinados a este concepto.

O superávit permite ao Concello de Ortigueira planificar con confianza os investimentos futuros, mantendo unha situación financeira sólida e sostible que responde as necesidades da comunidade e que cumpre coas promesas de prudencia financeira do equipo de goberno. Con este resultado positivo, o Concello reafirma o seu compromiso coa transparencia e a boa administración, á vez que contribúe ao desenvolvemento e benestar de todos os habitantes de Ortigueira.
“O futuro de Ortigueira constrúese cada día, e estes resultados económicos permítennos mirar cara a adiante con optimismo, mantendo os principios de prudencia e boa xestión que nos levaron ata aquí”, concluíu o alcalde Calvín.