A Xunta culmina a apertura da canle artificial de desaugamento da Lagoa da Frouxeira, en Valdoviño

A Xunta de Galicia acometerá mañá os traballos de apertura da canle de desaugamento da lagoa da Frouxeira, no municipio de Valdoviño.

Tralas abundantes choivas acaídas nos últimos días que elevaron o nivel de auga da lagoa, os técnicos da Dirección Xeral de Patrimonio Natural habilitarán o luns 28 de outubro a apertura da canle artificial temporal que permite desaugar o lago da Frouxeira coa fin de evitar inundacións e os danos que estas causarían tanto nos ecosistemas como na seguridade pública.

Actualmente, danse ciclos nos que a canle de comunicación entre a lagoa e o mar permanece pechada e, cando se produce unha suba do nivel de auga, prodúcense inundacións na zona viaria e nas vivendas, seguido dunha rotura brusca da barreira litoral e o baleirado da lagoa que é o que se pretende evitar con esta apertura controlada.

Esta actuación lévase a cabo seguindo o protocolo establecido no decreto 30/2015 polo que se aproba o Plan de conservación da Lagoa e Areal de Valdoviño, que converteu a este enclave no primeiro humidal protexido de Galicia que conta con esta figura de protección.

A lagoa de Valdoviño, un dos humidais protexidos de Galicia, está formada pola lagoa litoral da Frouxeira e por un sistema dunar en moi bo estado de conservación. É un dos lugares de maior diversidade de Galicia, tanto pola presenza de hábitats naturais e seminaturais de especial relevancia, como polo importante número de especies da fauna e flora protexidas.