O Concello remata a restauración do Cruceiro de Labañou

Os traballos sobre a peza, declarada Ben de Interese Cultural (BIC), foron coordinados pola restauradora Rocío Barreiro Lopo

O Concello da Coruña rematou a restauración do Cruceiro de Labañou, declarada Ben de Interese Cultural (BIC) polo seu valor patrimonial e histórico. Os traballos, iniciados no pasado mes de setembro, foron coordinados pola restauradora Rocío Barreiro Lopo, graduada pola Escola Superior de Conservación e Restauración de Bens Culturais de Galicia.

Leváronse a cabo en catro fases: desmontaxe do cruceiro para o seu traslado a taller, siglado e clasificación das pezas que o compoñen, restauración de elementos deteriorados e reposición dos faltantes e montaxe na localización orixinal. A intervención conta cun orzamento total de 14.000 euros para atender tanto ás necesidades de reparación como á mellora do estado de conservación e preservación do elemento para os vindeiros anos.
En concreto, acometeuse o tratamento de faltantes e restablecemento de elementos decorativos xunto coa limpeza e eliminación de vexetación e microorganismos mediante a aplicación de métodos de control para a ploriferación dos mesmos (especialmente vexetación adventicia, briofitos, fungos, algas e liques). cie.

De acordo co procedemento a seguir como elemento BIC, o Concello entregou a restauración para a súa valoración pola dirección xeral de Patrimonio Cultural de Galicia. O Goberno de Inés Rey culmina así a restauración do cruceiro, cumplindo cunha demanda dos veciños e veciñas do barrio de Labañou.