A Reserva de Biosfera, presente no VII Congreso Nacional de Ecoturismo como un dos exemplos de destino de ecoturismo familiar e neutro en carbono

● O vicepresidente da entidade e alcalde de Paderne, Sergio Platas, e o Director do PSTD, Diego López, participaron hoxe nunha exposición oral de experiencias e casos de éxito.

● Mariñas Coruñesas foi seleccionada desde a Secretaría do evento e por parte do Club de Ecoturismo de España pola tipoloxía de accións que se están desenvolvendo no Plan de Sustentabilidade.

● A Reserva de Biosfera é o único destino de Galicia que participa activamente e presentando o seu territorio como caso de éxito.

A Reserva de Biosfera Mariñas Coruñesas está presente no VII Congreso Nacional de Ecoturismo que se celebra estes días no Geoparque da Costa Vasca como un dos territorios exemplo como destino de ecoturismo familiar e neutro en carbono. A Secretaría do evento, e o Club de Ecoturismo de España, seleccionou á Reserva de Biosfera pola tipoloxía de accións que se están desenvolvendo no seu Plan de Sustentabilidade.
A Reserva de Biosfera é o único destino de Galicia que participa activamente no evento e presentando o seu territorio como caso de éxito; tamén o primeiro destino que se certificou en ecoturismo na Comunidade Autónoma.
O vicepresidente da entidade e alcalde de Paderne, Sergio Platas, e o Director do PSTD, Diego López, participaron hoxe nunha exposición oral de experiencias e casos de éxito. Tamén nunha serie de reunións con representantes doutros destinos de ecoturismo certificados a través do Club de Ecoturismo en España, administracións e empresas especializadas en ecoturismo.
A redución e mitigación da pegada de carbono do destino, a rede eco da Biosfera, o desenvolvemento do pacto verde municipal, o plan de mobilidade sostible, a rede de centros da Biosfera, a mellora da accesibilidade turística e a potenciación do atractivo turístico dos mercados da Biosfera foron os temas principais que se trataron durante a exposición.
Sergio Platas, vicepresidente da Reserva de Biosfera, destacou o papel da entidade como “axente dinamizador do turismo na provincia da Coruña e en Galicia” e subliñou os “importantes pasos que se están dando para un futuro no que a redución de emisións e o respecto ao medio serán fundamentais”.
Pola súa banda, Diego López, xerente do Plan de Sustentabilidade Turística Reserva de Biosfera Mariñas Coruñesas, fixo un repaso conceptual ao longo das accións realizadas os últimos anos, así como as accións a nivel futuro baixo o PSTD da Reserva de Biosfera, enmarcado nos fondos Next Generation.
“A instalación de puntos de recarga para vehículos nos 17 concellos que compoñen nosa Reserva de Biosfera, o realizar ordenanzas municipais para fomentar a economía circular, mellorar a conectividade recuperando senllas tradicionais e ecoturísticas, optimizar a accesibilidade no litoral da Reserva ou poñer en valor os produtos agroalimentarios e turísticos coa creación dunha marca propia son só algúns dos eixos sobre os que vertebramos o noso plan de acción”, sostén López, quen quixo agradecer “a invitación para poder participar neste Congreso Nacional de Ecoturismo no Geoparque da Costa Vasca, sen dúbida un dos territorios modelo en toda España”.