• O novo remolque permitirá a recuperación de espazos públicos e a renovación informática reducirá o consumo enerxético municipal.
O Concello de Ortigueira adquiriu un remolque adaptado para a limpeza e eliminación de residuos contaminantes, financiado polo Fondo de Compensación Ambiental correspondente á anualidade de 2024. Esta nova ferramenta permitirá mellorar a preservación e recuperación dos espazos públicos do municipio, asegurando un mantemento adecuado do medio ambiente local.
Ata a data, o Concello de Ortigueira non dispoñía dun equipo especializado para estes labores, o que facía máis difícil levar a cabo tarefas fundamentais na conservación de áreas públicas. Coa incorporación deste novo remolque, facilitarase a execución de todas as actividades necesarias para garantir a limpeza e protección da contorna natural do municipio.
Doutra banda, o Concello tamén puxo en marcha unha renovación do seu equipamento informático. Dotarase ao servizo de informática municipal de novos equipos de alta eficiencia enerxética, os cales serán asignados aos traballadores que teñen aprobado o teletraballo.
Actualmente, moitos dos equipos dos que dispoñen os empregados municipais xeran un alto consumo enerxético e, en moitos casos, permanecen acendidos as 24 horas do día para cumprir coas funcións de teletraballo. Esta actualización permitirá unha maior eficiencia enerxética, reducindo o impacto ambiental e optimizando o rendemento nas tarefas diarias do persoal do Concello.
Con estas accións, o Concello de Ortigueira reafirma o seu compromiso tanto coa sustentabilidade ambiental como coa modernización e mellora dos recursos municipais, sempre orientados a ofrecer un mellor servizo á cidadanía.
