O Teatro Colón acollerá en novembro os concertos conmemorativos polo 175º aniversario da Real Academia Galega de Belas Artes, con tres xornadas de actuacións

Cántigas da Terra, as corais polifónicas El Eco, Follas Novas e do Sporting Club Casino, a Banda Militar, a Orquestra Sinfónica do Conservatorio Superior de Música e a Banda Municipal de Música serán as protagonistas da programación

O concelleiro de Cultura e Turismo, Gonzalo Castro, participou este luns na presentación dos actos conmemorativos polo 175º aniversario da Real Academia de Belas Artes, que contará co apoio do Concello para a conmemoración dos ‘Concertos do centenario’, unha programación especial que terá lugar no Teatro Colón da Coruña os días 6, 7 e 8 de novembro, sempre ás 20.00 horas.
Nas actuacións participarán os coros e orquestras decanas da cidade da Coruña: Cántigas da Terra, Coral Polifónica El Eco, Coral Polifónica Follas Novas, Coral Polifónica Sporting Club Casino, Banda Militar (Unidad de Música del Cuartel General del Mando de Apoyo a la Maniobra), a Orquestra Sinfónica do Conservatorio Superior de Música e a Banda Municipal de Música.

Gonzalo Castro puxo en valor esta iniciativa, “coa que o Goberno de Inés Rey está firmemente comprometido, dando continuidade á aposta que hai na Coruña por visibilizar e coidar o patrimonio musical galego”.

Tres xornadas de festa pola música galega

Juan Durán, comisario musical dos actos polo 175º aniversario da Real Academia, explicou que, a través destes concertos, o obxectivo é lembrar o que se levou a cabo fai xustamente 75 anos, en 1949, no Teatro Rosalía de Castro, cando se conmemorou o centenario da fundación da Real Academia Galega de Belas Artes. Tamén entón participaron as agrupacións instrumentais e vocais de máis relevo da cidade, incluíndo música de compositores membros da Academia.
“Estes tres concertos están inspirados no ‘Gran Festival de Gala’ que a Academia celebrou en 1949 para festexar o seu centenario. Neste evento participaron as agrupacións históricas da Coruña, xa que naquel entón a Academia tiña rango provincial ata a súa conversión en entidade galega nos anos 80. Xuntáronse as forzas vivas da música da Coruña que interpretaron pezas de compositores galegos membros da Academia”, apuntou.

Ademais de Durán e Castro, no acto de presentación dos concertos, celebrado esta mañá no Teatro Colón, participou tamén o secretario da Real Academia de Belas Artes, Felipe Senén López, tamén académico da RAGBA.

Cómpre lembrar que o programa completo das actuacións previstas en novembro poderase consultar tanto na páxina web da Real Academia Galega de Belas Artes como na do Concello da Coruña.