Como xa se avanzara na sétima edición das xornadas A Pobra do Caramiñal no Tempo, o Concello formalizou xa a compra do Castro da Croa. O alcalde e titular da Concellaría do Patrimonio, José Carlos Vidal, deu a coñecer hoxe tódolos detalles sobre a adquisición desta propiedade por un importe de 68.195 euros. “Podemos dicir que este ben patrimonial xa é da veciñanza pobrense”, remarca o rexedor.
Vidal explica que o seguinte paso a tomar é traballar sobre o terreo, primeiramente, con técnicas non invasivas. “Hai interesantes proxectos científicos que se están desenvolvendo en toda Galicia arredor da Idade do Ferro. Queremos inserir este xacemento arqueolóxico dentro dunha investigación sobre a morfoloxía e estrutura dos castros no territorio galego. Cun xeorradar obteremos un retrato do que se agocha baixo a superficie deste predio aínda sen explorar. En función dos resultados que, agardo sexan prometedores, a nosa vontade é emprender unha campaña de escavacións que saquen á luz os segredos que agocha este lugar.”
Segundo apunta o mandatario local, “somos un goberno municipal que actúa en consecuencia aos compromisos adquiridos e, en materia patrimonial, xa se constata unha clara evolución. Comezamos o ano materializando a compra da Casa da Cadea, continuamos coa prospección arqueolóxica na Corte do Santo e a posta en marcha da sétima convocatoria das xornadas de divulgación histórica e patrimonial, ademais de progresar noutras iniciativas.”
A superficie desta parcela é de 8.804 metros cadrados, situada nunha zona elevada da parroquia de Santo Isidro de Posmarcos como se dun miradoiro natural se tratase preto do río Lérez.
Deja un comentario
Lo siento, debes estar conectado para publicar un comentario.