Cubrirán a compra de libros ou, no seu caso, material didáctico complementario
O Concello de Neda convoca un ano máis as súas axudas para a adquisición de libros de texto e material didáctico complementario, destinadas ás familias con rendas máis axustadas da localidade, cuxos fillos/as cursen estudos de calquera nivel educativo, agás o universitario. Estas bolsas buscan compensar os gastos derivados do arranque do curso académico 2024-2025.
Así, poderán optar ás axudas municipais as familias nedenses cuxa renda per cápita non superase durante o pasado ano os 400 euros mensuais. O alumnado para o que se pide a bolsa terá que estar matriculado en centros sostidos con fondos públicos, e poderá estar cursando educación infantil, primaria, secundaria, bacharelato ou formación profesional.
Segundo o establecido nas bases da convocatoria, a finalidade das axudas será a compra dos libros ou ben de material didáctico complementario, é dicir, material de papelería, mochilas e estoxos. E, evidentemente, as familias peticionarias non poderán ter recibido outra subvención pública para o mesmo concepto.
As bolsas van exclusivamente dirixidas a familias empadroadas no Concello de Neda, cunha antigüidade mínima de seis meses, que estean ao corrente das obrigas tributarias municipais. Os Servizos Sociais do Concello serán os encargados do estudio e valoración das solicitudes, primando especialmente ás familias con menos ingresos e as que dispoñan de máis fillos ao cargo. Unha avaliación que determinará a distribución dos 3.000 euros do orzamento reservados a este fin.
O prazo para presentar no rexistro municipal (horario de 9 a 14 h) as solicitudes e a documentación complementaria rematará o 24 de outubro.
