José Manuel Mato e Marisé Álvarez aproveitaron a visita para reunirse co director xeral de Maiores de Atención Sociosanitaria da Xunta, Antón Acevedo.
O alcalde de Ponteceso, José Manuel Mato, e a concelleira de Servizos Sociais, Marisé Álvarez, desprazáronse onte a Santiago de Compostela para visitar a exposición sobre a aldea cultural do Couto, organizada pola Fundación Eduardo Pondal. Este proxecto, que recolle a historia e as actividades culturais da aldea, é un exemplo de dinamización rural, destacando o traballo das entidades locais por preservar o patrimonio e impulsar o desenvolvemento comunitario.
No acto, ademais dos representantes do Concello, tamén participaron o director xeral de Maiores e Atención Sociosanitaria da Xunta, Antón Acevedo; o xerente da Fundación Eduardo Pondal, Xosé María Varela; e a presidenta da Casa da Muller do Couto, Uxía Varela. Todos eles amosaron o seu apoio e compromiso co proxecto, subliñando a importancia de seguir apostando por iniciativas culturais que revitalicen o territorio e melloren a calidade de vida das súas veciñas e veciños.
José Manuel Mato destacou a relevancia deste tipo de iniciativas para a comarca: “O Couto é un referente de participación cidadá e desenvolvemento cultural. Temos que seguir traballando conxuntamente para que proxectos coma este sigan medrando e contribuíndo a manter viva a nosa identidade.”
A visita serviu tamén para que Mato e Álvarez se reunisen con Antón Acevedo nas instalacións de San Caetano. Durante o encontro, abordáronse temas de gran interese para o Concello, como a posibilidade de asinar novos convenios de colaboración entre o Concello de Ponteceso e a Xunta de Galicia, así como a participación en futuras convocatorias de Casas do Maior. Mato afirmou que estas iniciativas “son fundamentais para mellorar a atención á nosa poboación maior e garantir que as persoas poidan envellecer activamente no seu entorno, con servizos que se adapten ás súas necesidades”.
Pola súa banda, Marisé Álvarez destacou o valor de fortalecer a cooperación entre administracións para impulsar proxectos sociais que beneficien á veciñanza. “Desde Servizos Sociais seguimos traballando para garantir que Ponteceso sexa un lugar onde todos e todas, especialmente os nosos maiores, teñan acceso a servizos de calidade e programas que melloren o seu benestar”, sinalou a concelleira.
Esta visita a Santiago de Compostela reflicte o compromiso do goberno municipal de Ponteceso en seguir colaborando con entidades como a Fundación Eduardo Pondal e a Xunta de Galicia, co fin de desenvolver proxectos innovadores que melloren a calidade de vida da veciñanza e poñan en valor o patrimonio cultural do municipio.
