A afluencia de persoas é moito maior que en edicións anteriores. As cinco polbeiras estiveron cheas durante toda a mañá e as visitas ao sepulcro da Santa tiveron ata 25 minutos de agarda
O alcalde de Brión estivo acompañado polo conselleiro de Presidencia, Xustiza e Deportes, así como por alcaldes e concelleiros da contorna
Brión vive hoxe un Día Grande de Santa Minia moi especial. En primeiro lugar, polo peche ao público de gran parte da carballeira. E, en segundo lugar, pola gran afluencia de romeiros e devotos de toda Galicia que ateigaron a contorna da capela de Santa Minia dende primeiras horas da mañá. Unha riada de xente como non se lembraba nos últimos anos e que, coincidindo coa misa solemne e a hora do xantar, mesmo colgou o cartel de “completo” nos aparcamentos máis próximos á carballeira, algo que non acontecera no último lustro.
O tempo está a acompañar, salvo algún que outro chuvasco ocasional pero de escasa entidade, o que animou a achegarse ata o santuario a milleiros de persoas non só de Brión, senón tamén das comarcas próximas como Santiago, Barbanza, Noia, Xallas e Ordes. De feito, xa durante a noite de onte xoves, Día de Vésperas, a parcela dos concertos estivo totalmente chea durante a tirada de fogos de artificio e a verbena coas orquestras Los Satélites e Olympus, cuxo final estivo pasado por auga debido a un forte trebón.
As visitas ao santuario comezaron ás nove da mañá e desenvolvéronse con colas, cunha espera media de dez minutos pero que aumentou ata os 25 minutos coincidindo coa celebración da misa solemne. Deste xeito, milleiros de devotos cumpriron coa tradición de bicar o sepulcro onde repousa a santa, pasar sobre el as típicas estampiñas de Santa Minia para que lles dean sorte durante todo o ano e deixar ao seu pe as figuriñas de cera con formas de mans, brazos, cabezas, pernas… de acordo con aquela parte do corpo na que pidan a actuación de Santa Minia e que os devotos mercaran minutos antes nos postos que rodean a capela
Coma en anos anteriores, e por razóns de seguridade, as candeas de ofrenda que traían os romeiros non foron depositadas na capela senón na casa reitoral, onde tiveron lugar as misas, que este ano reduciron a súa frecuencia no horario de tarde.
Romaría con novidades
Para dar a coñecer os traballos de repoboación que se están facendo na Carballeira de Santa Minia, pechada dende hai meses por motivos de seguridade, o Concello de Brión reabriu a parte xa saneada e cos novos carballos xa perfectamente adaptados ao terreo. No valado de peche da parte que aínda queda por analizar sanitariamente, o Concello dispuxo unha exposición fotográfica que recollía dende todos os carteis elaborados para a Romaría de Santa Minia como unha recompilación de fotografías antigas da celebración, algo que foi moi celebrado polos romeiros de maior idade.
As cinco polbeiras que estiveron cheas desde a súa instalación e non deixaron de vender racións de polbo e de churrasco. Hoxe, Día de Santa Minia, a espera media para entrar nelas roldaba entre os 10 e o 20 minutos, nas horas puntas. Pola súa banda, as atraccións infantís ateigaron a finca fronte ao centro social polivalente, onde hoxe ofreceron unha hora gratuíta para a rapazada de Brión e onde manterán un horario inclusivo de 16:00 a 17:00 horas no que funcionarán sen son, para facilitar a participación de persoas con diversidade funcional.
Entre esta parcela e o santuario de Santa Minia apostáronse preto de 150 postos de venda de rosquillas, roupa, chourizos, antigüidades, queixos, xamón ibérico, larpeiradas, licores, filloas, ferramentas, pulseiras, velas, imaxes relixiosas, música, zapatos, xeados…, así como varios food-tracks. A música nas rúas brionesas correu a carga das charangas Os Jalácticos e Os Celtas, así como do grupo de gaitas Airiños do Petouto. A sesión vermú correu a cargo da artista local Ruth Cundíns, nunha parcela próxima ás polbeiras onde esta noite actuarán as orquestras Marbella e Origen.
Autoridades
O alcalde de Brión, Pablo Lago, agradeceu o “extraordinario traballo que están a realizar os traballadores municipais, así como os membros de Protección Civil, Policía Local, Garda Civil, tanto de Brión como chegados doutras localidades, así como do persoal médico para que as festas se desenvolvan dentro da normalidade e sen ningunha incidencia”.
Lago Sanmartín guiou pola Romaría á comitiva oficial composta por Diego Calvo, conselleiro de Presidencia, Xustiza e Deportes; Marcos Araújo, xerente da Axencia Galega de Emerxencias; José Blas García Piñeiro, alcalde de Ames; Juan Manuel Saborido, alcalde de Carnota; Juan Manuel Rodríguez, alcalde de Cerceda; Francisco Xabier Castro Tourís, alcalde de Dodro; Manuel Ángel Leis Míguez, alcalde de Negreira; Lucía Calvo de la Uz, alcaldesa de Teo; e Diego Luís Díaz Méndez, alcalde de Val do Dubra. Tamén asistiron os concelleiros do grupo de Goberno de Brión Carlos Noya Pereira, José Antonio Vidal González, Sandy Cebral Gómez, Guarina Rey Vázquez e Rosa Romero Fariña, así como a concelleira popular María Fariña Bellón. Tras un paseo polos postos de venda, a comitiva participou nun xantar nunha das polbeiras.
Sábado e Domingo
Para o sábado 28, pasarrúas co grupo de gaitas Devagariño, actuación de DJ Nyan Boe e sesión vermú co grupo de humor Os Tristes, composto por Federico Pérez e Marcos Pereiro. Pola tarde, pasarrúas coa agrupación musical tradicional Tíralle do aire e concerto de Astarot e Sr Salvaje, coas súas respectivas xiras “40 aniversario” e “Vuela”.
Finalmente, o domingo 29 de setembro amencerá co pasarrúas do grupo de gaitas Airiños do Paseo de Colón e da charanga Os Celtas, que darán paso á sesión vermú co Festival Brión Inclúe. Actuarán a tiktoker Leti da Taberna, cun espectáculo de narración oral no que utiliza a ironía para facer crítica social dende unha perspectiva feminista; Iguatuke, un grupo de batukada inclusiva; e Chungo Pastel, un grupo de rock formado por persoas con diversidade funcional cun repertorio de versións de éxitos do pop-rock e algún tema propio. Pola tarde, Festival de Bandas de Música coas bandas municipais de Brión e CMUS de Carballo, previo ao concerto de Xabier Díaz & Adufeiras de Salitre.
