O Ágora acollerá o festival ‘Pola paz e contra as guerras’ coas actuacións de Mondra ou Leti da Taberna

Terá lugar o vindeiro xoves 3 de outubro a partir das 20.15 horas, con entrada de balde ata completar capacidade

O festival está promovido pola Asociación Veciñal da Agra do Orzán en colaboración con Pallasos en Rebeldía, no marco do programa ‘Ágra no Ágora’, financiado polo Concello da Coruña

O Centro Sociocultural Ágora acollerá o festival de artes escénicas e circenses ‘Pola paz e contra as guerras’, promovido pola Asociación Agra de Orzán e coordinada por Pallasos en Rebeldía no marco do programa ‘Ágra no Ágora’, financiado polo Concello da Coruña. O concelleiro de Cultura e Turismo, Gonzalo Castro, presentou a programación do festival, que terá lugar o vindeiro xoves 3 de outubro a partir das 20.15 horas, con entrada de balde ata completar capacidade. Na presentación estivo tamén Flor Antelo, presidenta da entidade veciñal.
“Nesta gala o humor e as artes escénicas póñense ao servizo da solidariedade para lembrarnos que os conflitos están aí, á nosa beira, poñendo en risco a nosa propia condición de humanidade”, explicou Iván Prado, representante de Pallasos en Rebeldía. No festival participarán a monologuista Leti da Taberna, a compañía de circo Desastronauts, o mago cómico Dani Blanco e músico Mondra, presentados polo pallaso Fran Rei e coa participación de Iván Prado. O concelleiro puxo en valor a presenza de artistas de primeiro nivel e embaixadores da cultura galega.
Castro destacou o impulso do Goberno de Inés Rey á programación cultural dende unha perspectiva solidaria, de acordo co apoio á gala ‘cultura contra a barbarie’. “Estamos onde temos que estar que é na defensa de paz e loitando contra as inxustizas e mais cando é un xenocidio como o que se está a producir en Gaza, coa vulneración de dereitos fundamentais dos pobos e das persoas” explicou.