O alumnado elaborou unha peza audiovisual para a segunda edición do certame audiovisual “People of the future”
Un grupo de corenta rapazas e rapaces de 3º e 4º da ESO do CPI Cernadas de Castro de Lousame participou esta mañá nuns obradoiros de videoactivismo medioambiental, organizados no marco do convenio de colaboración entre o Concello de Lousame e o Fondo Galego de Cooperación e Solidariedade. Uns talleres de tres horas de duración que buscan fomentar o pensamento crítico, a creatividade e a claridade expositiva entre a rapazada, así como poñer en valor os estilos de vida saudables que a xente nova está a adquirir na loita contra o cambio climático.
Acompañados por persoal especializado da ONG Agareso (Asociación Galega de Comunicación para o Cambio Social), o alumnado realizou actividades de introdución á linguaxe audiovisual e crearon vídeos de temática medioambiental. Unhas pezas que se presentarán na segunda edición do certame audiovisual “People of the future”. Unha iniciativa que está incluída no proxecto “People & Planet: un destino común” está financiado polo programa DEAR da Comisión Europea e involucra a dezasete entidades de oito estados membros da UE, máis Cabo Verde.
A concelleira de Ensino, Silvia Agrafojo, e a directora do CPI Cernadas de Castro, Pilar Cobas, asistiron a este obradoiro. Un taller que “ten como obxectivo concienciar aos nosos mozos e mozas sobre as graves consecuencias do cambio climático e conseguir que se convertan en axentes activos de transformación da nosa sociedade na procura dun mundo máis sustentable”, apunta Silvia Agrafojo.
Deja un comentario
Lo siento, debes estar conectado para publicar un comentario.