A Coruña acollerá a sétima edición do encontro cultural Modulartec entre os días 3 e 5 de outubro, cunha ampla programación de concertos e actividades formativas

O concelleiro Gonzalo Castro participou hoxe no acto de presentación do certame, que inclúe actuacións na Fundación Luís Seoane, o planetario da Casa das Ciencias e as igrexas da Orde Terceira e As Capuchinas

O concelleiro de Cultura e Turismo, Gonzalo Castro, participou esta mañá no acto de presentación da sétima edición do Modulartec, un encontro cultural orientado á creación sonora que se desenvolve na cidade desde hai máis dun lustro, e que inclúe unha ampla oferta de concertos, conferencias, obradoiros e actuacións en directo, asociadas á música creada mediante a síntese modular.
A posta de longo da programación desta nova edición tivo lugar na Fundación Luís Seoane, unha das localizacións dun Modulartec que se realizará os días 3, 4 e 5 de outubro e que contará, ademais de coa propia Fundación Luís Seoane, coa colaboración da rede municipal de Museos Científicos Coruñeses.

Será precisamente no pioneiro da rede, a Casa das Ciencias, onde se abrirá o Modulartec deste ano. O xoves 3 de outubro, ás 21.00 horas, Rói Earan —XEaranX— abrirá o encontro deste ano cunha actuación no planetario. XEaranX é un estudoso e músico dende moi novo, que aos seis anos comezou co piano e aos sete iniciouse na gaita. Tras tocar en varias bandas de rock, formouse en arpa celta e especializouse na música tradicional e folk de Galicia.

Ademais, o mesmo xoves 3 e tamén no planetario, Borja Bernárdez, artista visual e metade do colectivo MIL111, presentará o seu novo proxecto en solitario, ‘MAKYO’.
Un taller de formación con sintetizadores modulares
A xornada do venres 4 arrincará ás 18.30 horas na Fundación Luís Seoane, cun taller formativo deseñado para músicos, produtores e entusiastas da música electrónica que desexen profundar na creación de live sets utilizando instrumentos, hardware e sintetizadores modulares. Para inscribirse no taller é imprescindible enviar un correo electrónico ao enderezo lab@modulartec.com antes do mércores 3 de outubro, co nome completo e os datos do DNI.

Xa posteriormente, ás 21.00 horas, comezarán as actuacións de Francisco López, recoñecido internacionalmente como unha das figuras máis importantes do panorama da arte sonora e a música experimental. López foi galardoado catro veces con mencións honoríficas no concurso do Festival Ars Electronica e recibiu o Premio Qwartz 2010 á mellor antoloxía sonora.
Tras López será a quenda de L.A.R. Quicios, a partir das 22.30 horas.

Parautas pechará a programación da última xornada, na Fundación Luis Seoane
O sábado 4, última xornada do Modulartec 2024, contará con actividades repartidas entre a igrexa da Orde Terceira, a das Capuchinas e a Fundación Luís Seoane.

A programación do día comezará ás 17.00 horas en San Francisco, con Elena Córdoba, artisticamente coñecida como Novia Pagana, produtora musical, compositora e creativa audiovisual que conta cunha sólida traxectoria de postas en escena a través de concertos en diversos actos relacionados co teatro, o cinema, a danza, o deseño e as artes sonoras.

Xa ás 19.00 horas, nas Capuchinas, actuarán Laura Moyano e Juanma Cidron. A xienense, cun amplo percorrido profesional en xéneros como o ensemble barroco, a música de cámara, a ópera e a electrónica, estará acompañada por Cidron, que volve ao Modulartec tras a súa presenza no cartel do ano 2020.

O peche da xornada terá lugar na Fundación Luís Seoane e correrá a cargo de Collapse, ás 21.00 horas, seguidos de Iván Pavlov, artista sonoro e músico establecido entre Francia, Suecia e Rusia. A súa actuación, ás 22.00 horas, precederá á de Parautas, pseudónimo de Carlos Gómez, produtor e DJ santiagués que escolleu este nome en homenaxe ao seu bisavó. Actuará ás 23.00 horas.
No acto desta mañá, Gonzalo Castro estivo acompañado por Ricardo Ramos, director do Modulartec.