As persoas afeccionadas ao mundo da interpretación de Neda seguirán tendo unha cita semanal no municipio. O Concello retoma en outubro as súas escolas municipais de teatro. As agrupacións infantil-xuvenil e a de adultos manterán intacto o seu potente equipo docente, contando como mestres e directores con Marián Rey e Agustín Bolaños.
A partir do próximo mes, os participantes destas aulas culturais volverán facerse co escenario do salón de actos da Casa da Cultura. O Concello retoma esta aposta, que botaba a andar hai xa sete anos para brindar á veciñanza un espazo no que poder expresarse e desenvolverse a través da arte. Talleres para fomentar a creatividade, crear afección pola dramaturxia e iniciar aos nedenses no campo da interpretación.
Neste novo curso, Marián Rey, fundadora da compañía Teatro Calavera volverá poñerse á fronte do cadro de actrices e actores infantil e xuvenil. Un grupo aberto a nenos/as e rapazada de ata 16 años. A compañía infantil, que participaba o pasado curso por primeira vez no “XXV Certame de teatro escolar e afeccionado da Deputación da Coruña”, obtendo diplomas para as actuacións de varios dos seus integrantes, pechaba curso coa estrea da comedia “Casa Amanda”. Pola súa banda, o taller de teatro de adultos seguirá contando como mestre, un ano mais, co actor, director e distribuidor Agustín Bolaños, que actualmente lidera O Catre Teatro.
Nos dous casos, as clases terán lugar os mércores pola tarde, en horario de 17 a 19:30 horas (estableceranse dous grupos de infantil en función da idade) e de 19:30 a 21 horas será a quenda dos maiores. Apuntan dende o Concello que, ao estar os grupos consolidados, as posibilidades de incorporarse están moi limitadas, podendo só quedar libre algunha vacante (981 390233).
Deja un comentario
Lo siento, debes estar conectado para publicar un comentario.