A alcaldesa presidiu a gala celebrada en EXPOCoruña e celebrou que A Coruña acolla neste 2024 un total de 44 congresos e eventos
A Coruña acolleu este xoves a súa segunda edición da gala Noche de Embajadores, un evento clave para promover o turismo MICE (Reunións, Eventos, Incentivos, Congresos e Exposicións) na cidade que está apoiado polo Concello a través do Consorcio de Turismo. A alcaldesa, Inés Rey, presidiu o acto celebrado en EXPOCoruña, que recoñeceu aos profesionais que posicionan a cidade como un destino de referencia para a organización de grandes eventos.
A rexedora estivo acompañada polo concelleiro de Cultura e Turismo, Gonzalo Castro. Ademais, tamén participaron no acto o presidente de Convention Bureau, José Blanco, e o vicepresidente da Deputación da Coruña, Xosé Regueira. A gala contou coa presenza de importantes figuras do ámbito empresarial, académico, médico e cultural.
“A Coruña é hoxe un referente en turismo MICE grazas ao apoio público-privado que implantamos desde o meu goberno e ás infraestruturas de primeiro nivel que temos”, sinalou Inés Rey durante a súa intervención. Neste 2024 hai prevista a celebración dun total de 44 congresos e eventos na cidade, cunha asistencia confirmada que supera as 100.000 persoas. A alcaldesa sinalou o gran respaldo do turismo MICE no conxunto de visitantes que recibirá este ano a cidade e lembrou que A Coruña “viviu un dos seus veráns máis exitosos”, con máis de 660.000 persoas asistentes aos eventos organizados ou promovidos desde o Concello, cun impacto económico directo e indirecto de 89,4 millóns de euros.
Durante a gala recoñeceuse o labor de catro profesionais que foron clave na promoción da cidade como destino de congresos e eventos: A presidenta da Asociación Vida Sana e da feira Biocultura, Ángeles Parra, os doutores Roque Devesa e Marisa Crespo e o Real Club Deportivo, que recollerá o seu conselleiro Carlos Ballesta. Todos eles recibiron unha escultura da Torre de Hércules realizadas en vidro fusionado pola artista Julia Ares.
A Noche de Embajadores consolidouse como un evento crave para recoñecer o esforzo daqueles que contribúen ao desenvolvemento do turismo MICE na cidade. Dirixida a profesionais de distintos sectores, a gala busca involucrar a empresarios, académicos, médicos e outros prescritores que, a través do seu traballo e redes de contactos, apoien a organización de eventos de gran envergadura na Coruña.
