Gran debut en solitario dos cinco integrantes do Combo de Rock da Aula de Música de Oroso, que ofreceron o seu primeiro concerto no centro cultural de Sigüeiro. Unha actuación que estivo presidida polo alcalde de Oroso, Manuel Mirás Franqueira, e polo concelleiro de Seguridade Viaria, Antonio Leira Piñeiro.
O grupo ofreceu unha combinación de temas acústicos e vogais de grandes bandas de rock como Green Day, Red Hot Chili Peppers, Los Ramones ou The Kinks. Especialmente aplaudidas polo público presente foron grandes himnos do rock como “Californication”, “You really got me” ou “What a wonderful world” interpretados maxistralmente por Antón Rochela á guitarra, Salvador Pérez á batería, Xosé López ao baixo, Daniel Jorge Fernández á frauta e Andrea Paiceira ao teclado.
O concerto tivo lugar baixo a supervisión dos seus mestres da Aula de Música de Oroso, que nalgunha das actuacións fixeron un reforzo e que ao final se animaron a tocar unhas pezas de jazz da man de Juan Salgueiro, Pablo Pérez e Francisco Salgueiro. O director da Aula de Música orosá, Juan Salgueiro, explicou que este tipo de concertos serven para “amosar a aproximación que dende a Aula de Música facemos aos estilos modernos, cubrindo así un amplo espectro das demandas musicais dos alumnos”.
