Inés Rey: “A cidade adáptase aos cambios, ás persoas, e as imaxes son a mellor testemuña para lembrar e poñer en valor eses cambios”
O exemplar reúne trece fotografías antigas da cidade pertencentes á colección Bartolomeu-Chavert
O Palacio Municipal de María Pita acolleu esta mañá o acto de presentación do Calendario Histórico da Coruña 2025, unha iniciativa que chega á súa novena edición e na que o Concello colabora coa Compañía de Tranvías e a Asociación de Xornalistas Deportivos para a súa difusión.
“Nesta edición temos imaxes moi evocadoras que van dos barrios ao centro, da praia a montaña e tamén algunha outra sorpresa que nos teletransportan, por exemplo, á Fábrica de Tabacos da Palloza e as súas mulleres traballadoras” sinalou a alcaldesa. As imaxes do calendario, pertencentes á colección Bartolomé-Chavert e cedidas polo coleccionista Alfonso Bartolomé para dar forma á publicación, recollen instantáneas da cidade nas que se retratan dende unha parella de mulleres nun coche pola praza de Azcárraga ou dous homes na praia do Parrote, xunto con monxas e alumnas da Compañía de María ou a boda de Pilar Martínez e Rogelio Yáñez.
Rey destacou outras imaxes nas que se representa o antigo aspecto da rúa de San Andrés como bulevar, actualmente en obras para a súa recuperación; así como unha relativa ao núcleo das Xubias, cuxa rexeneración está xa en proxecto: “A cidade adáptase aos cambios, ás persoas, e as imaxes son a mellor testemuña para lembrar e poñer en valor esos cambios” explicou.
Ademais, o calendario inclúe preto de 600 fitos históricos da cidade, ordenados día a día e recompilados polo xornalista Rubén Ventureira, autor dos textos da publicación. As citas van dende o pasado más antigo, coa primeira invasión viquinga o 1 de agosto do 844; ou a primeira referencia a Coruña como cidade no 1399. Tamén se recolle o ascenso do Básquet Coruña á ACB, unha das 30 efemérides novas desta edición.
O acto pechouse cun coloquio divulgativo sobre as imaxes do calendario, no que formaron parte Xosé Alfeirán, Rubén Ventureira e o propio Alfonso Bartolomé. Na presentación tamén interviron José Ignacio Prada, director da Compañía de Tranvías; e Alex Centeno, presidente da Asociación de Xornalistas Deportivos. A alcaldesa agradeceulle a colaboración no calendario: “ambos representades moi ben esa alma que defende a publicación deste calendario, por tradición e vinculación coruñesa mais tamén polo apoio a manter viva a nosa memoria” sinalou.
O Calendario Histórico da Coruña conta con códigos QR, accesibles dende o teléfono móbil a vistas actuais e en 360 graos das zonas que aparecen nas fotografías antigas. Está xa á venda nas principais librarías e quioscos da cidade a un prezo de 9,95 euros.
