― En total, beneficiáronse nesta convocatoria 46 restaurantes en 99 establecementos de aloxamento en toda a Comunidade galega
― Entre outras accións sufráganse melloras de accesibilidade, obras para adaptarse a normativas e mellora da clasificación, aforro enerxético ou dixitalización
A delegada da Xunta na Coruña, Belén do Campo, visitou o establecemento restaurante Insua para informar da resolución da convocatoria de axudas de 3,5M€ que sufragan as actuacións de accesibilidade, dixitalización ou modernización que fagan os establecementos turísticos galegos, tanto de aloxamento como de restauración, e das que se benefician este ano un total de 145 establecementos turísticos en Galicia. Este establecemento recibiu un apoio de máis de 16.000 euros para actuacións de renovación e modernización das súas instalacións.
A delegada puxo en valor o presente e o potencial do sector turístico en Galicia, que neste 2024 xa está superando as cifras de peregrinos, viaxeiros e de ocupación hoteleira rexistradas a estas alturas do ano pasado. Neste censo, apuntou que estes apoios aos aloxamentos e restaurantes son unha medida máis da Xunta para potenciar un sector estratéxico para Galicia.
As subvencións convocadas por Turismo de Galicia concedéronse en réxime de concorrencia competitiva e foron beneficiarios na comarca de Bergantiños-Costa da Morte 4 aloxamentos de Cee, Fisterra, Muxía e Carballo e 3 restaurantes da Laracha, Fisterra e Cee que en total recibirán máis de 165.000 euros. En Galicia recibirán estes apoios 46 restaurantes e 99 establecementos de aloxamento. Por provincias, na de A Coruña benefícianse 44 negocios turísticos (21 aloxamentos e 23 restaurantes)
Belén do Campo explicou que “esta liña de axudas enmárcase no traballo da Xunta de Galicia por apostar por apoiar ao sector turístico na mellora e actualización dos seus establecementos e afondar así na calidade do destino. Entre os proxectos presentados sufráganse, entre outras actuacións, as que estean destinadas a mellorar as condicións de accesibilidade e supresión de barreiras arquitectónicas”. Tamén obras que melloren as instalacións coa finalidade de obter certificacións de calidade, en especial o Q de Calidade Turística ou actuacións que permitan a adaptación ás modificacións normativas e á mellora da clasificación do establecemento que supoñan un incremento de categoría.
Aforro enerxético
Esta liña de axudas tamén sufraga as actuacións de renovación e modernización das instalacións e embelecemento do contorno da instalación, equipamentos mobles necesarios para o funcionamento, obras de climatización que favorezan a sustentabilidade coa implementación de medidas de aforro enerxético, así como a instalación ou mellora de sistemas de extracción e renovación do aire
Tamén inclúe tamén actuacións de dixitalización dos sistemas de xestión e comercialización do establecemento, e a adaptación dos sistemas de seguridade e saúde na prestación de servizos.