· O elenco do festival complétano Abril, Arredores e Terbutalina.
· Celebrarase, como xa é tradición, no Campo dá Feira de Guísamo, o sábado 24 de agosto.
A XXIII edición do festival Guísamo Folk xa está aquí. Este evento, xa consolidado no panorama provincial da cultura, celebrarase este ano o sábado 24 de agosto no xa tradicional emprazamento do Campo dá Feira de Guísamo.
Este ano, o festival conta cun cartel de luxo, encabezado por un dos grupos galegos máis populares dos últimos anos: Tanxugueiras. Olaia e Sabela Maneiro e Aída Tarrío volverán a Guísamo tras cinco anos, pois xa participaron na edición de 2019. Tras catapultarse á fama no Benidorm Fest de 2022, nos últimos anos non pararon de cultivar éxitos alá por onde pasaron.
Xunto a elas estarán tamén o vigueses Abril. O trío, formado por Claudia Abril (voz e percusión), Mariña Carpente (violín e voz) e Antón Lago (guitarra e voz), é un proxecto que mestura músicas de raíz galega e ibérica con outros xéneros.
O terceiro dos grupos desta edición é Arredores, un grupo que non quere etiquetarse nun só xénero e que ofrece concertos cheos de enerxía e música que non encaixe nun só estilo musical. Ademais, este concerto será moi especial para un dos seus membros fundadores, Andrés R. Boutureira, pois é veciño de Guísamo.
Por último e como fin de festa chegará Terbutalina. Formado en 2010 por tres novos de Esteiro que querían proxectar a imaxe do seu pobo por toda Galicia. Cunha extensa traxectoria, Migui, Mon, Torres e Diego farán gozar ao Campo dá Feira co seu “gastropunk”.
Os concertos comezarán sobre as 20:00 horas, pero, para os que vaian comer xa pola zona, o Concello organiza unha serie de obradoiros e actividades para os e as máis pequenos/as. Ademais, o grupo Sobrádevos #vos realizará varias actuacións durante a tarde para animar o ambiente antes dos concertos.
Desde o Concello de Bergondo esperan que “o festival volva ser todo un éxito, pois xa é un evento totalmente consolidado”. “Tentamos, como xa fixemos noutras edicións, abarcar diferentes gustos musicais e que cada persoa poida gozar do festival á súa maneira”, explican.
Non se esquecen de agradecer a “veciños e veciñas, que sempre colaboran para que o festival sexa todo un éxito”.
