Haberá case 10.000 euros en premios para as persoas mellor clasificadas
O domingo 6 de outubro de 2024 terá lugar a Carreira Popular Coruña10, a máis multitudinaria das carreiras da cidade, e que este ano realizará a súa décimo oitava edición cun circuíto urbano, homologado pola Real Federación Española de Atletismo. Este luns abriuse o prazo de inscrición para todas aquelas persoas que desexen participar.
As inscricións faranse a través da páxina web www.carreirasgalegas.com ata o día 29 de setembro ás 23:59 horas. A cota de inscrición será de 8 euros para as persoas rexistradas ata o 18 de agosto, e de 12 euros para quen realice a inscrición desde ese día ata o 27 de setembro. Haberá un prazo extraordinario os días 28 e 29 de setembro cunha cota de inscrición de 20 euros. As inscricións presenciais poderanse facer no horario comercial do centro de El Corte Inglés (rúa de Ramón y Cajal) desde o luns 29 de xullo.
Como vén sendo habitual, as e os menores tamén contarán coas súas probas. Nesta XVIII Carrera Popular Coruña10 poderán participar atletas, con inscrición gratuíta, desde a categoría peques ata sub-18. A carreira ten un perfil practicamente chairo e por asfalto na súa totalidade. A saída e a meta estará situada en Porta Real e a proba atravesará os Cantóns, Linares Rivas, a estrada do porto e o interior dos peiraos.
As primeiras persoas clasificadas na carreira Coruña10 obterán distintos premios económicos en función da categoría e a súa procedencia. Haberá un total de 9.700 euros para os mellores corredores e corredoras. Ademais, aquelas persoas participantes que batan o récord da proba tanto na categoría masculina (28’09”) como na feminina (31’40”) obterán un premio de 2.000 euros. O regulamento, así como todos os servizos que ofrece Coruña10, poderán atoparse na web municipal www.coruna.es/carreraspopulares.
