Friday 27 de September de 2024

Ponteceso mellorará os accesos ao Toural e a Brixeria cun investimento de máis de 47.000 euros


 A actuación está financiada con fondos da Dirección Xeral de Desenvolvemento Rural

 En ambos casos regularizarase o terreo e realizarase a colocación de xabre nas zonas onde é preciso

O Concello de Ponteceso vén de iniciar as obras de renovación dos accesos ao Toural e a Brixeria.

A execución contará cun orzamento de 47.970 euros, financiados a través da Dirección Xeral de Desenvolvemento Rural.

No acceso ao Toural, as obras consistirán na regularización e a nivelación da superficie, cunha colocación de xabre natural nas zonas necesarias cun espesor medio de 10 cms. A continuación colocarase unha capa de rodadura continua con formigón de 15 cms. Por último, realizarase a recollida de pluviais a través dun tubo de PP corrugado de 400 mm.

No acceso número 2, en Brixeria, procederase a regularizar o terreo, cunha achega de xabre natural nas zonas onde é preciso, cun espesor de 10 cms, e establecerase unha capa de rodadura continua de formigón cun espesor de 10 cms.
O alcalde de Ponteceso, José Manuel Mato, subliñou que “coa renovación destes dous viais municipais melloraremos as infraestruturas básicas no municipio, facilitando o acceso e a circulación no tecido comunicativo do Concello”.

Mato quixo destacar que “é moi importante manter as conexións coas parroquias nun bo estado para mellorar a seguridade tanto do tráfico rodado como dos peóns e, tamén, facilitar o día a día da nosa veciñanza”.