Mostraranse as liñas principais de investigación do centro, así como directrices da Axencia Galega de Calidade Alimentaria no referente á I+D+i
A Consellería do Medio Rural promove unha xornada de portas abertas no Centro de Investigacións Agrarias de Mabegondo (CIAM) o martes 11 de xuño. Neste evento expoñeranse as vías de desenvolvemento da Axencia Galega de Calidade Alimentaria en relación á I+D+i e presentaranse proxectos de investigación do CIAM.
A axencia, a través da Área de Formación, Innovación e Investigación Agraria, incentiva os procesos para a actualización e innovación no sector agroalimentario e forestal, difunde o resultado dos coñecementos obtidos nos centros de investigación e incrementa, mediante a formación e transferencia tecnolóxica, o nivel tecnolóxico dos sectores produtivos.
Tras máis de 130 anos de investigación agraria en Galicia, o centro de Mabegondo conta con diferentes proxectos relacionados coa produción vexetal e animal, tecnoloxía de produtos, procesos, ambiente, seguridade alimentaria, economía, socioloxía e política agraria. Entre os máis actuais salientan “Estudos preliminares para o establecemento dun programa de avaliación de raza porcina Porco Celta” ou “Control sostible das malas herbas en viveiros”.
Outras das súas actuacións teñen como fin o fomento da conservación e do uso e desenvolvemento sostible dos recursos xenéticos endóxenos na agricultura. O obxectivo é potenciar o desenvolvemento e establecemento de produtos agrarios de calidade cun maior valor engadido baseándose na adaptabilidade das variedades cultivadas ao medio ambiente, en diversificar e diferenciar a produción, conservar a diversidade dos cultivos agrarios ou evitar a erosión xenética, entre outras cuestións.
As inscricións para a xornada de portas abertas poderanse realizar no correo electrónico ciam.cmr@xunta.gal ou no teléfono 881 881 807.
