O Pleno do Concello aprobará o vindeiro xoves 30, na sesión ordinaria do mes de maio, unha declaración institucional subscrita por todos os grupos municipais en apoio ás persoas afectadas pola Esclerosis Lateral Amiotrófica que busca impulsar a tramitación da proposición da Lei ELA.
Os catro grupos municipais aprobarán o vindeiro xoves esta declaración na que instan á tramitación desta proposición para que “as persoas afectadas por esta cruel doenza, as familiares e as coidadoras, sexan amparadas, en igualdade de trato co resto de persoas enfermas de calquera patoloxía, coa cobertura sociosanitaria que precisan para poder vivir con dignidade”. Para isto, a Corporación quere “empregar a súa voz para facer chegar unha petición alta e clara ás Cortes Xerais españolas” para que dea os pasos necearios para “evitar a morte innecesaria e inxusta de persoas enfermas, o esgotamento dos recursos propios e familiares na súa atención e a desesperación das afectadas”.
A Corporación entende que esta nova norma “non pode volver ser anulada por trámites burocráticos, por deixamento lexislativo ou por establecemento doutras prioridades” e recoñece que, a pesar de non contar coas competencias sanitarias, “os municipios, como as entidades públicas máis achegadas á realidade cotiá da súa poboación, non podemos, non debemos, e non queremos darlles as costas a aquelas que máis precisan do noso compromiso público para superar o seu día a día”.
A Declaración tamén recoñece o “traballo realizado dende hai tanto tempo polas asociación de persoas afectadas e entidades colaboradoras que, coñecedoras de primeira man da dura realidade desta enfermidade”, e en concreto o da asociación AGAELA (Asociación Galega de Afectados/as pola Esclerose Lateral Amiotrófica).
Tamén se fai fincapé en que a ELA é unha patoloxía neurodexenerativa, sen cura e sen tratamento hospitalario “que fai recaer toda a carga do coidado das persoas enfermas na súa rede persoal de apoio (familia, amizades, coidadoras)” e que ademais conleva unha carga económica da que é “imposible de afrontar os custos mínimos, non xa para manter unha vida de calidade, senón, simple e desgraciadamente, a vida mesma”.
Por todo isto, o Concello comprométese nesta declaración a instar ao Estado a que “proceda á tramitación de xeito preferente, urxente e prioritario dunha proposición de lei que recolla as mellores achegas de cada unha das normas aprobadas, e á “Deputación Provincial da Coruña e á Xunta de Galicia para que, dentro do ámbito das súas competencias sociosanitarias, teñan en conta as necesidades do colectivo de doentes e familiares, á hora de deseñar, implementar e aplicar políticas que poidan incidir na mellora da calidade de vida das persoas afectadas”, e expresa a súa intención de “continuar prestando apoio público á reivindicación legal contida nesta moción, ata o momento en que a norma sexa publicada e entre en vigor”.
O Concello tamén se compromete “a poñer á súa disposición o asesoramento técnico dos Servizos Sociais municipais á hora de tramitar todas aquelas axudas e prestacións establecidas para a mellora da calidade de vida das persoas enfermas” e, a colaborar coa asociación AGAELA “naquelas accións que esta asociación leve a cabo para dar visibilidade e concienciar sobre a realidade desta patoloxía”.
