A xerente de Chan Empresarial do Atlántico (SEXA), Beatriz Sestayo, coincide co alcalde de Ribeira, Luís Pérez Barral, na inmediata necesidade de crear chan industrial na comarca do Barbanza.
O equipo de Chan Empresarial do Atlántico, encabezado pola súa xerente Beatriz Sestayo, acudiu na mañá de onte ao Concello de Ribeira coa intención de abrir vías de comunicación que permitan satisfacer a alta demanda de chan industrial na comarca.
Na xuntanza decorrida en Ribeira entre o equipo e xerente de SEA, o alcalde, tenentes de alcalde e concelleira de Facenda, abordouse o feito de que os parques empresariais de Rianxo, Boiro, A Pobra do Caramiñal e Ribeira están ocupados na súa totalidade e existe interese do empresariado por instalar as súas compañías na zona, tanto SEA como o Concello de Ribeira coincidiron en destacar que urxe unha solución rápida a estas demandas.
O Concello de Ribeira traballa actualmente en buscar apoios para un futuro polígono na súa área de influencia. Sestayo comprometeuse a estudar este proxecto, pero ha anunciando que SEXA apoiará a dotación de chan no lugar no que se demostre máis viable, “porque o fin é favorecer a esta comarca para que poida seguir xerando emprego a través da implantación de novas empresas ou doutras que necesiten ampliar as súas instalacións. Para iso debemos xerar vías de colaboración entre diferentes concellos e diferentes administracións”.
Pola súa banda, o alcalde Pérez Barral apoia a decisión de SEXA “porque a comarca do Barbanza é moi dinámica e necesita espazos onde asentar empresas e xerar empregos”. O rexedor destacou que a prioridade do Concello pasa por desenvolver o proxecto emprazado no lugar de Pedras Vermellas, para o que é necesaria a cooperación entre institucións, xa que o parque ascende a 258.926 metros cadrados e prevese un investimento de máis de 13 millóns de euros. Barral agradeceu a visita de Sestayo e a
disposición para buscar solucións para que Ribeira e a comarca do Barbanza.
Chan Empresarial do Atlántico, S.L. é unha Sociedade Mercantil Estatal, participada, maioritariamente, cun 83,44 %, polo Ministerio de Vivenda do Goberno de España, a través de Sepes, Entidade Estatal de Chan. No accionariado de SEA tamén se integran a Xunta de Galicia, cun 14,91% e Abanca, como posuidora dun 1,65%.
