Este martes 23 de abril celébrase o Día Internacional do Libro. Unha data na que se multiplican as actividades de animación á lectura e de promoción do sector, sobre todo da vertente creativa. En San Sadurniño as propostas comezaron xa hoxe con dous contacontos dirixidos á rapazada do CPI e da EIM A Rolada ofrecidos pola narradora Vero Rilo e a escritora e divulgadora María Canosa. Mañá, día grande da literatura -que virá seguido en menos dun mes da festa das Letras Galegas- tocaralle a quenda a un obradoiro co debuxante Óscar Villán, Premio Nacional de Ilustración en 1999.
No caso do alumnado de 1º, 2º e 3º de Educación Primaria do CPI de San Sadurniño, a Biblioteca Municipal convidou a Vero Rilo a través do programa Ler Conta Moito para compartir coa rapazada a escolma oral “E a ti que che contaban…?”.
Neste espectáculo, a contadora seleccionou obras de autoría coñecida con outras tradicionais ás que lles xuntou xogos, co obxectivo de achegar ás nenas e nenos á fantasía, sabedoría e riqueza da memoria colectiva feita palabra. Contos que Rilo -unha das grandes narradoras galegas da actualidade- enriquece con pinceladas que transmiten valores como o do respecto, a igualdade, ou a corresponsabilidade.
Mañá, tamén na Casa da Cultura, os cativos e cativas de 4º e 6º de Educación Primaria -5º anda preparando a ópera deste ano do proxecto LÓVA- asistirán a un obradoiro impartido polo debuxante Óscar Villán, autor entre outras das ilustracións da serie “O Coelliño branco” da editorial Kalandraka, que lle valeron en 1999 o Premio Nacional de Ilustración.
A actividade ten como obxectivo sementar entre as pequenas e pequenos a curiosidade polo debuxo que complementa as narracións, ás veces como parte máis importante. Tal e como apunta a responsable da biblioteca, a charla “centrarase no proceso de ilustración dun libro que toma como referencia o traballo do propio Óscar inicialmente, pero tamén o de moitos outros debuxantes, pintores e artistas con estilos e puntos de vista distintos, coa intención de mostrar o amplo abano de posibilidades que ofrece o mundo do debuxo, do libro ilustrado e da arte”.
Esta iniciativa organizada pola Biblioteca Municipal de San Sadurniño súmase con motivo do Día do Libro a outras que levará a cabo o propio centro de ensino durante a xornada. É o caso, por exemplo, dos “apadriñamentos” onde o alumnado dos últimos cursos de Primaria escolle libros na biblioteca da escola para contarlle contos ou anacos de historias ás nenas e nenos máis pequenos, quen logo lles volven o detalle ás súas madriñas e padriños cun pequeno agasallo.
“Unha fábrica de bicos” na EIM A Rolada
Ademais do alumnado do CPI, o da EIM A Rolada tamén participou nunha sesión co gallo do Día do Libro. De feito, as crianzas da escola infantil recibiron a visita da escritora de literatura infantil e xuvenil -ademais de poeta e columnista- María Canosa.
Canosa, moi coñecida tamén pola súa faceta televisiva, tróuxolles a súa obra “Unha fábrica de bicos”, protagonizada por Mindi, unha nena á que non lle gusta que lle dean bicos… nin tampouco dalos. Ese é o arranque dunha historia na que a protagonista -e tamén as nenas e nenos da Rolada- descubriron a máquina que fabrica bicos no noso interior e os fai saír polos beizos.
