Máis dúas novas residencias privadas no Concello, unha en Bastiagueiro e outra en Iñás, xa se fala do tixolo xeriátrico no Concello. Modelo que se move entre dous extremos: o do negocio puro e duro e o da precariedade asistencial, un prestado por empresas controladas por fondos de capital que mesmo operan desde paraísos fiscais e o outro por entidades vinculadas a Igrexa católica. A pandemia fixo agromar con toda crueza as deficiencias do modelo de residencias. No BNG temos un modelo de residencias que entende o coidado dos e das nosas maiores como un servizo público que garanta unha vellez digna. Sendo responsabilidade única da Xunta, interpelaremos ao Concello sobre que acha deste aluvión de centros privados fronte a un cativeiro e absolutamente insuficiente única residencia pública.
Ademais, o noso portavoz municipal fará varias preguntas sobre temas que afectan á cidadanía, entre elas:
Primeiro tanatorio no territorio municipal e de carácter privado
O grupo municipal do BNG de Oleiros leva dende o 2007 reclamando a creación dun tanatorio público no Concello, polo que a próxima construción dun tanatorio privado é máis unha oportunidade perdida para dar exemplo de políticas públicas. Pediremos ao Concello que no futuro, xa que semella que xa existe unha licenza para este tanatorio privado en Iñás, teña en conta esta necesidade de servizos públicos sempre máis eficaces e xustos que os privados.
Para cando do saneamento do Porto de Lorbé?
No pasado mes de febreiro, a Xunta de Galiza finalizou o último treito da Vía Ártabra no porto de Lorbé, acompañado dos correspondentes traballos de mellora, dentro dos cales ficaron instalados trece novos sumidoiros e as conducións que facilitan a instalación do bombeo de saneamento.
Na actualidade, o Porto de Lorbé, que é competencia da Xunta de Galiza, carece de saneamento, co conseguinte problema sanitario e ambiental. O BNG levará esta permanente problemática ao Parlamento da Galiza mais tamén preguntaremos no pleno se o Goberno local coñece se a Xunta se vai facer cargo do saneamento do Porto de Lorbé, e en que prazo.
