Os centros socioculturais da Pobra do Caramiñal dinamizaranse con varios obradoiros artesáns de balde dentro do programa Feito coas túas mans que se estenderá ata finais de ano.
Durante o acto de presentación, a concelleira da Promoción Económica, Amparo Cerecedo, incide en que se proseguen achegando actividades ás parroquias do termo municipal. Alí estivo na compaña de José Manuel Riveiro (SonAgasallo), Loaira Pérez (Raposiñas), David Pérez (Noites de Datura) e Carla Martínez (Flow de Meiga). “A Concellaría da Participación Veciñal organiza esta serie de obradoiros co afán de crear comunidade e potencia-la creatividade”, manifesta a edil.
A cestaría estará impartido por La Parabólica, no Campiño, durante os sábados do período comprendido entre o 27 de abril e o 4 de maio. Tamén contará con este taller A Ribeiriña, a cargo de Capixuta, nos sábados do 18 ao 25 de maio. En ámbolos casos, o horario será de 16.00 a 20.00 horas.
Noites de Datura será o encargado de ensinar sobre macramé no Camiño Ancho. Será nos mércores do mes de xuño, dende as 18.00 ata as 20.00 horas.
O muíño da Ponte Barbanza contará con cerámica da man de Raposiñas. Desenvolverase nos mércores do mes de setembro, de 18.00 a 20.00 horas.
Tamén haberá clases para traballa-la madeira con SonAgasallo, en Santo Isidro, nos mércores do mes de outubro, en horario de 18.00 a 20.00 horas.
E haberá ocasión para aprender a facer xabóns, con Flow de Meiga, na Angustia. Terá lugar nos mércores do mes de novembro, dende as 18.00 ata as 20.00 horas.
As prazas son limitadas e formalizaranse as inscricións a través do enderezo electrónico participacionvecinhal@gmail.com. Deberanse aporta-los seguintes datos: o nome, os apelidos, o DNI, o teléfono de contacto e o/s obradoiro/s no/s que participar.
