Os obradoiros darán comezo a próxima semana, cunha sesión semanal nos locais sociais de Sanguiñal, Aldeagrande, Cruído, Vilacova e Escabia. A inscrición estará aberta durante todo o curso
A Concellería de Servizos Sociais do Concello de Lousame convoca a edición número 21 dos Obradoiros da Memoria, unha actividade gratuíta dirixida a mellorar a calidade de vida dos veciños e veciñas maiores de 60 anos a través de actividades dirixidas a manter e mellorar capacidades como a atención, a memoria, o cálculo ou a linguaxe. Unha iniciativa organizada polo Concello de Lousame en colaboración da Consellería de Política Social e Xuventude.
A concelleira de Servizos Sociais, Silvia Agrafojo, explica que o obxectivo é “mellorar a calidade de vida dos nosos maiores a través de actividades que exercitan a súa memoria para así previr ou retardar a aparición do deterioro cognitivo, ao tempo que promovemos a socialización destas persoas, que teñen así un día e un lugar no que xuntarse coas amizades e coa veciñanza para recordar o que xa saben e seguir aprendendo cousas novas”.
Inscricións abertas todo o ano
Os obradoiros abrirán as súas portas a próxima semana e as clases impartiranse todos os martes nos locais sociais do Sanguiñal (dúas sesións de 09:30 horas e 10:30 horas) e Aldeagrande (12:00 horas), os mércores no local social de Cruído (10:00 horas), os xoves no local social de Vilacoba (10:00 horas) e os venres no local social da Escabia (11:30 horas). As sesións terán lugar ao longo dunha hora e para formar grupo será necesario un mínimo de 5 persoas participantes.
“Dende o Concello animamos a todas as persoas maiores de Lousame a que veñan participar nesta actividade pois notarán que mellora moito a súa calidade de vida”, apunta Silvia Agrafojo, quen apunta que “de haber novas incorporacións, o Concello está disposto tanto a incrementar o número de sesións como a levar os talleres a outras parroquias”.
Os Talleres de Memoria están abertos a todos os veciños e veciñas de Lousame maiores de 60 anos. A inscrición é totalmente de balde e pode facerse en calquera momento do ano nos Servizos Sociais de Lousame, chamando ao 981 820 494 ou por WhatsApp no 689 126 385. As clases inclúen actividades para manter e mellorar capacidades como a atención, a memoria, as funcións executivas, o cálculo ou a linguaxe. Unhas áreas que se traballan mediante dinámicas e exercicios adaptados tanto ao nivel do grupo como ao de cada persoa participante. O ano pasado contaron coa participación de máis de medio cento de persoas.
