O presidente de AGAT e a coordinadora do servizo presentaron o informe anual nunha xuntanza co alcalde e a concelleira de Servizos Sociais
A Unidade de Desenvolvemento Infantil e Apoio Familiar (UDIAF) de Bergantiños, xestionada pola Asociación Galega de Atención Temperá (AGAT), atendeu ao longo do ano pasado a 125 familias, segundo o balance que veñen de presentar o presidente de AGAT, Jaime Ponte, e a coordinadora do servizo, Yaiza Antelo, nunha xuntanza co alcalde, Evencio Ferrero, e a concelleira de Servizos Sociais, Igualdade e Sanidade, Maica Ures.
A UDIAF puido atender a case un 17% máis de familias que o ano anterior grazas á ampliación do equipo, que conta agora mesmo con seis profesionais, ás que está previsto sumar en breve unha nova logopeda. No 2023, ademais do reforzo de persoal, tamén melloraron os recursos materiais da UDIAF, que dispón dunha área de psicomotricidade totalmente renovada grazas ao investimento realizado polo Concello de Carballo.
A unidade, que neste 2024 celebra presta asesoramento e orientación ás familias e apoio ao desenvolvemento a nenos e nenas de 0 a 6 anos, a través dun convenio que vén asinando anualmente coa Consellería de Política Social da Xunta de Galicia. Unha parte fundamental do traballo da UDIAF consiste en coordinarse e colaborar con profesionais dos diferentes servizos e recursos que atenden á infancia desde outros servizos, como colexios, centros de especialidades ou sanitarios. O ano pasado esa coordinación realizouse con 83 entidades, e ademais no mes de outubro levouse a cabo unha formación na que participaron os/as pediatras da zona.
Os datos
Segundo consta na memoria anual, no 2023 foron atendidas 125 familias, realizáronse 3.396 prestacións de apoio personalizado e 689 actuacións de coordinación con outros profesionais e recursos. A redución do tempo de demora de acceso é un dos datos máis salientables do balance, xa que pasou dos 222,57 aos 188,22 días.
O 67% dos/as usuarios/as residen no municipio carballés, e o resto repártense, de xeito proporcional á poboación de cada concello, entre Coristanco, Laxe, Ponteceso, Malpica e Cabana de Bergantiños.
A idade media de acceso ao servizo segue aumentando, o ano pasado moi lixeiramente, ata os 3,08 anos (no 2022 a media fora de 3,05 anos, e no 2020, de 2,9 anos). Polo que se refire á tipoloxía dos problemas atendidos, os principais corresponden ao retraso evolutivo (39,47%), sitúanse no ámbito afectivo-emocional (23,97%) ou afectan á linguaxe e a fala (14,88%), pero na UDIAF tamén se atenderon problemas de hábitos, de conduta, de atención, motrices, sensoriais, sindrómicos e cognitivos. A valoración das familias segue sendo moi boa, e no 2023 outorgaron á unidade de Carballo unha puntuación de 4,87 sobre un máximo de 5.
A sede da UDIAF está na avenida do Ambulatorio, nun local cedido polo Concello de Carballo no antigo ambulatorio. O servizo é público e gratuíto. O contacto pode realizarse a través do correo electrónico bergantinos@atenciontemprana.com ou ben chamando ao teléfono 881 946 410.
