Outra das grandes novidades é a incorporación de dúas novas rutas que completarán os sete trens turísticos de Galicia, a ‘Termal e do Camiño do Norte a Santiago’ e a da ‘Lamprea e o viño do Condado’
A directora de Turismo de Galicia, Nava Castro, presentou en Madrid no marco de FITUR a nova edición de ‘Galicia a todo tren’, o programa dos trens turísticos da Comunidade galega.
Unha das grandes novidades do programa para esta nova edición é a saída, por primeira vez na súa historia, do tren Al-Andalus dende Madrid unindo a capital coa meta do Camiño de Santiago, Santiago de Compostela.
Segundo explicou Nava Castro, o tren de luxo máis amplo e espazoso do mundo, realizará unha saída en xullo e outra en agosto desde Madrid para chegar a Santiago de Compostela.
A directora de Turismo de Galicia afirmou que este feito histórico será de gran importancia para a nosa comunidade, en xeral, e o Camiño de Santiago, en particular, xa que Madrid é a comunidade autónoma de onde procederon máis peregrinos no pasado ano 2015.
Dous novos trens turísticos
Por outra parte, a responsable de Turismo da Xunta anunciou a incorporación de dúas novas rutas que completarán os sete trens turísticos de Galicia, a ‘Termal e do Camiño do Norte a Santiago’ e a da ‘Lamprea e o viño do Condado’.
Nava Castro sinalou que o Tren termal e do Camiño do Norte a Santiago circulará entre A Coruña e Lugo e “permitirá mostrar tres elementos primordiais da nosa oferta turística, a riqueza termal, o Camiño de Santiago e o Patrimonio da Humanidade”. Deste xeito, engadiu, “os usuarios deste tren gozarán das instalacións termais do balnearios de Guitiriz, seguirán as pegadas dos peregrinos no Camiño do Norte, declarado Patrimonio da Humanidade en 2015, e viaxarán ao pasado romano na cidade de Lugo”, tamén declarada Patrimonio da Humanidade no ano 2000.
Por outra parte, a directora de Turismo de Galicia explicou que o ‘Tren da Ruta da Lamprea e o Viño do Condado’ ten programadas as súas saídas desde Santiago de Compostela.
No seu percorrido, segundo sinalou Nava Castro, este tren turístico achegará aos visitantes ás beiras do río Miño, “o que lles permitirá coñecer de primeira manun patrimonio etnográfico centrado na Ruta da lamprea”. Así, neste percorrido, manifestou a directora de Turismo de Galicia, “visitarán o Pazo de Lourizán e os seus xardíns que conteñen unha mostra da botánica forestal de extraordinario relevo en Galicia e deteranse na cidade de Pontevedra para contemplar a cidade e poder xantar na mesma”.
Incremento da oferta global
No próximo verán mantéñense as rutas dos trens turísticos que xa circularon o ano pasado relacionadas cos faros, entre Ferrol e Ribadeo; os xardíns e pazos históricos, entre Ferrol e Ribadeo; e as que percorren as cinco denominacións de orixe vitivinícolas de Galicia.
A oferta deste programa compleméntase un ano máis co Tren do Peregrino, o Tren dos Balnearios e o Galicia Rail Pass, a través dos que se pode vivir a experiencia do Camiño de Santiago, gozar do termalismo galego ou desprazarse en tren por toda Galicia para coñecer os seus múltiples recursos.
Con todo, para esta nova edición increméntase a oferta global en 84 novas prazas.
Produto de éxito, competitivo e diferencial
Ao longo da súa intervención, a directora de Turismo de Galicia lembrou que este foi un proxecto turístico pioneiro que se iniciou no ano 2013 grazas a creación de sinerxías entre os diferentes sectores e axentes e a conciliación entre o que significa o aproveitamento turístico dun territorio e a preservación do medio no que se desenvolve,
Nava Castro lembrou que o pasado ano o programa superou os 2.200 pasaxeiros, incrementándose a demanda en máis de cinco puntos porcentuais en relación á edición anterior, alcanzando unha ocupación do 87%.
Para rematar, a directora de Turismo de Galicia agradeceu a colaboración “tan intensa de RENFE e a da Deputación de Ourense, grazas a cal este programa é hoxe, non só unha realidade senón un produto de éxito, competitivo e diferencial”.
