§ As obras foron adxudicadas por 224.491 euros e teñen un prazo de execución de seis meses.
O goberno local continúa mellorando os servizos da veciñanza. Trátase dun compromiso que acaba de referendar co recente inicio do proxecto para instalar un novo colector de interceptación da rede de pluviais no núcleo de Ponteceso e de mellora da drenaxe do Xuncal. As obras foron adxudicadas por 224.491,3 euros e contan cun prazo de execución de seis meses.
Por unha banda, o Concello mellorará a rede de pluviais na capital municipal coa colocación dun novo colector. Esta nova estrutura recollerá parte das augas pluviais que chegan ao núcleo de Ponteceso, evitando a súa incorporación á rede de saneamento unitaria sita baixo a zona de intervención. As actuacións suporán a canalización de 237 metros de tubo e a execución de oito arquetas de interceptación, seis pozos de rexistro (dous deles con sumidoiro) e de tres treitos de caz cunha lonxitude total de 29 metros lineais. O proxecto incluirá a reposición das redes afectadas, do pavimento e o repintado da sinalización neste punto.
No Xuncal, os labores suporán a reposición da clapeta sita na zona, un elemento que na actualidade se atopa en mal estado de conservación. As obras consistirán na instalación dunha nova comporta que substituirá á existente na actualidade, así como na colocación dun novo colector que facilite a saída de auga neste punto.
O Concello procederá ao desvío previo do río para poder traballar en seco colocando, ademais, unha barreira de retención de sedimentos para protexer o medio natural. A continuación, procederase á demolición dos muros de contención, disporase o novo colector de formigón e levarase a cabo a execución dos dous muros escollera e a instalación da nova comporta.
