A xornada abrirase ás 10.00 horas coa disputa da carreira na categoría absoluta, unha proba cun percorrido de 6.250 metros que sairá desde o parque de San Diego e pasará por Os Castros, Eirís e O Castrillón
O circuíto de carreiras populares Coruña Corre volve este domingo coa segunda proba do calendario deste ano, a XI Volta a Oza, cita na que xa confirmaron a súa participación máis de 1.600 persoas.
A xornada de competición desenvolverase de 10.00 a 13.00 horas, e abrirase coa disputa en categoría absoluta, cun percorrido de 6.250 metros que dará comezo no parque de San Diego, en dirección á rotonda de cruzamento entre a rolda de Outeiro, rúa Posse e avenida do Exército, onde se enfilará o camiño de subida cara á avenida da Pasaxe e, posteriormente, unha nova subida pola avenida da Concordia. A partir de aí, o percorrido adéntrase no barrio do Castrillón, polas rúas Alacante e José María Hernansáez, para chegar ao parque de Eirís, con volta posterior pola avenida Casanova de Eirís, pasando por diante do Centro Deportivo do Castrillón, que marca o ecuador da carreira. Desde este punto, descenso polas sendas interiores do parque de Oza, dous treitos de subida e baixada pola rolda de Outeiro e chegada final ao parque de San Diego.
Xa a continuación, a partir das 11.30 horas, comezarán as saídas progresivas das categorías inferiores, tamén desde o parque de San Diego, con percorridos que van dos 2.430 aos 150 metros en función da idade das e dos rapaces participantes.
As entregas de premios terán lugar na zona de saída e meta —ou no Polideportivo Municipal de San Diego, en caso de choiva—. Ás 11.15 horas, ás e aos atletas vencedores da proba absoluta. E xa as 13.00 horas, aos gañadores en categorías inferiores.
O concelleiro de Deportes, Manuel Vázquez, fixo un balance positivo da cifra de persoas que xa confirmaron a súa participación na proba deste domingo, coa que o Goberno de Inés Rey dá continiudade ao circuíto Coruña Corre, fomentando a práctica deportiva e os hábitos saudables entre a cidadanía, a escala interxeracional.
A recollida de dorsais, entre o sábado e o domingo no Polideportivo de San Diego
O Complexo Deportivo Municipal de San Diego abrirá as súas portas durante a fin de semana para facilitar a loxística e atención ás persoas participantes de cara á proba.
Neste sentido, a recollida de dorsais estará centralizada precisamente no Complexo. O sábado 6, de 11.00 a 20.30 horas, e o domingo 7, desde as 09.00 ata unha hora antes do comezo de cada unha das categorías.
O propio día da carreira haberá, ademais, servizo de gardarroupa, en horario de 09.30 a 11.30 horas. Tamén servizo de duchas, de 10.30 a 13.00 horas.
Cómpre lembrar que tamén se proporcionará auga e avituallamento sólido a todas as persoas participantes en cada unha das categorías, nun lugar visible despois da meta.
