A Xunta de Goberno Local aprobou na sesión ordinaria deste luns as bases da convocatoria de axudas ao estudo para o alumnado do segundo ciclo de educación infantil e do Conservatorio Municipal de Música. O importe das primeiras increméntase un 33% para as familias beneficiarias, que este curso recibirán unha bolsa de 200 euros para material escolar. Nos últimos dez anos, o aumento foi do 100%. Con respecto ao CMUS, as axudas representan o 50% do custe da matrícula. A partida destinada este ano pola Concellaría de Educación ás bolsas de estudos ascende a un total de 70.000 euros. O prazo de solicitude abrirá a partir da publicación da convocatoria correspondente.
Na sesión deste luns tamén foi aprobada a subvención nominativa anual para a Agrupación de Voluntarios de Protección Civil, por un importe de 25.000 euros.
Entre outros asuntos, a Xunta de Goberno Local tamén aprobou facturas de gasto por importe de 82.549 euros e varias licenzas urbanísticas, entre elas tres para outras tantas vivendas unifamiliares en Cernide, Camiño do Bosque e Fontecaldeira, todas elas na parroquia de San Xoán Bautista.
