A alcaldesa de Santiago, Goretti Sanmartín, acompañada polas coordinadoras da campaña de 7H Sociedade Cooperativa Galega, presentou esta mañá a iniciativa “Construamos o termo feminista de Compostela” que se materializará nunha serie de encontros participativos que se desenvolverán ao longo dos meses de marzo, abril e maio. O Concello de Santiago fará un recoñecemento a varias mulleres que son referentes da cidade tanto pola súa traxectoria profesional como vital, no acto “Mulleres de Compostela 2024” que terá lugar na Sala Mozart do Auditorio de Galicia este xoves 7 de marzo ás 19:30 h. O propio día do 8 de marzo, o Pazo de Raxoi acollerá a lectura do manifesto e a entrega do Premio Xohana Torres 2023.
A alcaldesa salientou que con esta nova campaña “Construamos o termo feminista de Compostela”, o Concello de Santiago pretende ir “alén do propio día 8 de marzo” e amosar “o compromiso continuo coa loita contra a discriminación das mulleres” de xeito “colectivo e cooperativo” xunto co movemento asociativo compostelán. Con este obxectivo, o Goberno municipal pon en marcha un “proceso participativo” no que se debaterán unha serie de cuestións e temas concretos para así recoller toda “a enerxía, a forza, o traballo e as ideas” do movemento feminista para o seu desenvolvemento posterior e “redefinir as políticas feministas e de igualdade que se fagan desde a propia institución municipal”.
Segundo a rexedora, esta iniciativa permitirá abrir “espazos de encontro e de diálogo” ao redor da construción do ‘termo feminista de Compostela’, un concepto que está vinculado tanto ao ‘termo’ municipal do Concello, como ao de ‘remate’, co propósito de que a cidade se consolide como un “espazo feminista que sexa un ben colectivo, non só para as mulleres, se non tamén para a conxunto da sociedade”.
“Construamos o termo feminista de Compostela”
‘Termo Feminista’ é unha proposta de creación artística comunitaria desenvolvida polo Concello a través de 7H Sociedade Cooperativa Galega, coa que se busca aproveitar a forza do 8M para reactivar, empoderar, poñer en valor e visualizar as iniciativas cidadás que, tanto de xeito individual, como colectivo, axudan a construír unha Compostela máis xusta e igualitaria para todas as persoas.
Segundo explicaron as coordinadoras da campaña, a proposta articúlase como un “convite en positivo” dirixido tanto aos colectivos feministas como á cidadanía en xeral para participar nunha serie de encontros ao redor de distintos temas e ideas. A cita de arranque terá lugar o vindeiro 11 de marzo baixo o título “Cultivar o termo feminista de Compostela” que servirá a modo de presentación da iniciativa e das persoas participantes e sentará as bases do proceso que se desenvolverá noutros catro encontros, cada un deles centrado nun tema diferente. O do 22 de marzo será sobre a memoria e a historia; o do 5 de abril sobre a planificación urbanística e a ordenación do territorio; o 12 de abril sobre a natureza, o medio ambiente e o ecofeminismo, e no último encontro, que terá lugar o 19 de abril, tratarase o “termo feminista das Persoas”, cun debate sobre os coidados.
O peche deste proceso terá lugar o 4 de maio cun acto de celebración da construción do termo feminista que incluirá unha mostra de creación artística colectiva.
Todas as persoas interesadas poderán inscribirse desde hoxe no seguinte formulario.
Mulleres de Compostela 2024
O programa de actividades do 8M arrancará este xoves co acto de recoñecemento “Mulleres de Compostela 2024” organizado polo Concello de Santiago, no que se porá en valor o traballo feito por 8 mulleres que “son de Compostela ou viven e desenvolven as súas tarefas profesionais na cidade” e que “tamén contribuíron á construción do termo feminista de Compostela”, segundo salientou Goretti Sanmartín.
O acto recoñecerá o labor de dúas mulleres referentes no mundo da cultura actual como son a cineasta Jaione Camborda, que coa súa película O Corno acaba de gañar a Cuncha de Ouro do Festival de San Sebastián e a prolífica poeta Yolanda Castaño, recentemente galardoada co Premio Nacional de Poesía 2023. Tamén recibirán o recoñecemento o grupo de pandeireteiras Leilía, pioneiras da música galega tradicional que veñen de celebrar a súa despedida dos escenarios tras máis de tres décadas de andaina.
Tamén se distinguirá a María Jesús Lamas Díaz, directora da Axencia Española de Medicamentos, que tamén o foi do Servizo de Farmacia do CHUS; Nanina Santos Castroviejo, historiadora e pioneira do feminismo organizado e promotora dende o ano 1983 de Andaina, a revista galega de pensamento feminista, e a profesora do IES Rosalía de Castro e impulsora do Premio San Clemente, Maribel Martín.
Este recoñecemento municipal tamén irá para dúas figuras referentes do comercio compostelán: María Pereira, que estivo 35 anos á fronte do negocio Dosel de fabricación artesá de tecidos e encaixes tradicionais na rúa Nova, e Julia López, que con 90 anos segue detrás do mostrador da mítico negocio familiar Fotos Sandine na rúa do Vilar.
O acto será conducido por Rosa Aneiros e contará coa actuación de Caamaño e Ameixeiras que interpretarán varios temas.
Manifesto e Premio Xohana Torres
O propio venres, 8 de marzo, levarase a cabo a lectura do Manifesto que corresponde á Declaración institucional que foi aprobada por unanimidade polos grupos que conforman a Corporación o pasado 28 de febreiro. A continuación, o Pazo de Raxoi acollerá o fallo e a entrega do Premio Xohana Torres 2023.
Este venres tamén se abrirá o prazo de presentación de propostas á edición 2024 do Premio Xohana Torres de ensaio, investigación e creación audiovisual sobre as mulleres na sociedade galega’. A esta convocatoria, que permanecerá aberta ata o 30 de decembro, pode concorrer calquera persoa física ou agrupacións de persoas sen personalidade xurídica e os traballos deben tratar da participación social e política das mulleres e ter como obxectivo reconstruír a súa memoria histórica. Poden ser ensaios literarios ou científicos, mais tamén pezas audiovisuais sobre as mulleres galegas ou experiencias das mulleres en Galicia.
Cada premio, un na modalidade de ensaio e outro na modalidade de creación audiovisual, estarán dotados con 2.500 euros, que cubrirán os dereitos de edición das obras por parte do Servizo de Publicacións da USC.
