A escritora de Zaramagoso (Fruíme, Lousame) foi recibida pola alcaldesa, Teresa Villaverde, e a concelleira de Cultura, Silvia Agrafojo
A alcaldesa de Lousame, Teresa Villaverde, e a concelleira de Cultura, Silvia Agrafojo, recibiron a Lucía Rodríguez Figueira, veciña de Zaramagoso (Fruíme, Lousame), quen este sábado 24 de febreiro presentará o seu primeiro libro: “Nora”. Unha presentación que terá lugar na Casa da Cultura de Lousame entre as 17:00 e as 18:30 horas.
Villaverde Pais amosou todo o seu apoio a Lucía Rodríguez e desculpouse por non poder acompañala na presentación en sociedade do seu primeiro libro. Un acto no que será presentada pola concelleira Silvia Agrafojo e onde as persoas asistentes tamén poderán mercar un exemplar do libro asinado pola autora e editado por Universidad Literaria.
Soño feito realidade
Para Lucía Rodríguez, esta presentación é “un soño feito realidade. E que mellor que presentalo en onde son natural, cos meus veciños e con todos os meus coñecidos”. “Nora” é unha historia de traizón e celos editada por Universidad Literaria que combina momentos románticos con escenas eróticas. Conta a historia de Nora, unha muller sumisa inmersa nun matrimonio cheo de mentiras e enganos ata que, coa axuda duns bos amigos logra saír dese burato, fortalecendo a súa autoestima e vencendo os seus medos. Para logralo, superará situacións de medo, indecisión e traizón, ademais doutros momentos fermosos como atopar o verdadeiro amor que a axuda e a apoia sen condición.
Aínda que se trata do seu primeiro libro, Lucía Rodríguez xa pensa nun segundo. “Xa houbo xente que me dixo que querían outro e máis grande, que este se lles fixo pequeno. E si que me gustaría facer outro. De feito, se este ten éxito, a propia editorial vaime apoiar en facer outro”. Iso si, os fans terán que agardar un tempo porque “non será inmediatamente. Levo un par de anos un pouquiño complicados e tamén necesito parar un pouquiño e desfrutar deste. Repousar, coller ideas novas e despois, se a oportunidade aparece e a editorial me apoia iremos por outro”.
A autora
Lucía Rodríguez Figueroa é natural de Zaramagoso, parroquia de Fruíme. Sempre foi afeccionada a escribir pero nunca se atrevera a publicar, ata que editorial Diversidad Literaria lle ofreceu unha oportunidade de cumprir un dos seus soños. Así, Lucía Rodríguez comezou a escribir a través dun concurso de micro-relatos eróticos convocado por esa editorial a través de Facebook. Un concurso no que o seu relato foi escollido entre os presentados en toda España para formar parte dun libro de antoloxía de temática erótica. Un libro comercializado a través de Internet e onde Lucía foi unha das dúas persoas que máis vendas conseguira, o que lle permitiu asinar un contrato editorial con Diversidad Literaria para escribir este libro en solitario.
