Están valorados nun total de 1.000 euros.
O alcalde, José Manuel López Varela, e a concelleira de Promoción Económica, Rocío López, fixeron hoxe entrega dos regalos do programa Agasalla comercio local, ten premio ás persoas agraciadas no sorteo realizado entre todas as tarxetas rasca e gaña que foran depositadas nas urnas habilitadas nas tres bibliotecas municipais.
Os premios foron os seguintes:
- Videoconsola PlayStation 5: Ángela María Loureiro García.
- Xamón ibérico: Juan José Cotelo Outeiro.
- Experiencia turística: Sonia Mariño Cotelo.
O Concello impulsou esta iniciativa co triplo obxectivo de sensibilizar á poboación sobre a importancia de facer as compras no comercio de proximidade, atraer e fidelizar á clientela e subvencionar as compras dos cidadáns.
Puxéronse a disposición dos establecementos adheridos un total de 10.000 tarxetas rasca e gaña para entregar aos clientes por cada compra de dez euros. 1.000 desas tarxetas contiñan un premio directo de dez euros para consumir no comercio local e nos servizos de proximidade, e para as 9.000 restantes ofrecíase a oportunidade de depositalas nas urnas cos datos persoais para entrar no sorteo dos tres regalos, que están valorados nun total de 1.000 euros.
O alcalde aproveitou o acto para avanzar que neste ano 2024 o Concello ten previsto levar a cabo novos programas de apoio ao sector do comercio local despois das experiencias positivas tanto de Agasalla comercio local, ten premio como de Eu merco na Laracha realizadas en 2023.
