A actuación garante unha maior seguridade viaria en horario nocturno
O Concello, a través da súa área de Infraestruturas, mellorou a calidade da iluminación nocturna do paseo marítimo, ao seu paso polas Escravas, con 20 novos puntos de luz, que xa están instalados e operativos. Con esta intervención o Goberno de Inés Rey mellora a seguridade viaria nunha zona moi transitada pola cidadanía e que conta ademais cun carril bici de recente creación.
Nos últimos días instaláronse 13 novos puntos de luz na zona peonil onde se atopa o citado
carril bici. A potencia de cada un destes puntos de luz é de 38 vatios e están a unha altura de 4 metros sobre columnas. Ademais, instaláronse outros sete na zona lateral, que vai en dirección aol andén de Riazor, e contan cunha potencia de 34 vatios.
En total, 20 puntos de luz de nova creación que permitiránlle á cidadanía ter unha maior visibilidade na contorna en horario nocturno. Esta zona do paseo marítimo acumula durante todo o ano un denso tránsito peonil e ciclista, polo que o Goberno de Inés Rey decidiu acometer esta actuación de mellora.
O Goberno de Inés Rey continúa a mellorar a eficiencia enerxética da cidade coa renovación de toda a iluminación viaria grazas á axuda de 12 millóns de euros do IDAE para a substitución de todos os puntos do iluminación pública. Ademais, durante o pasado mandato tamén se executaron os traballos de creación do carril bici que une este paseo das Escravas co xa existente no paseo Marítimo e que proporciona seguridade viaria e continuidade circulatoria ás persoas usuarias de bicicletas.
