As entradas saen á venda mañá en Ataquilla, na praza de Ourense en no propio teatro
O Concello da Coruña, a través da súa Área de Fomento e Promoción da Cidade, organizará no Teatro Colón un concerto moi especial do grupo de música tradicional galega Leilía.Será o 7 de xaneiro ás 20.30 horas.
O grupo de cantareiras actuará na cidade na súa xira de despedida dos escenarios ‘Anque me vou non me vou’. As entradas para o seu recital estarán dispoñibles este martes, 5 de decembro, a partir das 11.00 horas en Ataquilla e no despacho de billetes do Teatro Colón e da praza de Ourense.
Leilía, formado no 1989 por Ana Rodríguez, Felisa Segade, Mercedes Rodríguez, Montse Rivera, Rosario Rodríguez e Patricia Segade, é un dos nomes máis recoñecidos no panorama do folk galego e un dos primeiros grupos de cantareiras en Galicia. No seu espectáculo de despedida mesturarán cancións novas, do seu último traballo, ‘Vidas Cantadas’, con outros clásicos do seu repertorio.
O Goberno de Inés Rey amosa con esta nova actuación o seu compromiso coa cultura galega e coa música tradicional, que conta cun papel destacado dentro da programación cultural da cidade ao longo do ano.
