Os traballos de acondicionamento das beirarrúas da Avenida de Alxeciras encaran a súa recta final. Así, a próxima semana arrinca a pavimentación das beiravías afectadas pola actuación. Esta intervención esixirá novas restricións no aparcadoiro no tramo en obras que estarán operativas dende este domingo.
Explican dende o Concello que, co obxectivo de facilitar e axilizar ao máximo o remate do proxecto, dende o domingo e ata a finalización das obras quedará prohibido aparcar en ambas marxes da avenida no tramo comprendido entre a rúa Roseira e o Camiño do Regueiro. De feito, o mesmo luns está previsto que a empresa Construcciones Siber Ordes SL inicie as tarefas para reparar a área da estrada inmediata á zona peonil.
Con esta mellora da capa de rodadura nas beiravías trátase de devolver ao estado no que se atopaba antes das obras o firme da vía, que se veu afectado polo proxecto executado. A intervención completará o proxecto, que permitiu dotar ás beirarrúas da zona dun novo pavimento de baldosa hidráulica, fronte ao anterior de formigón, que presentaba resaltes e obstáculos; ademais da instalación de novas canalizacións para recoller as augas pluviais e a substitución nas tubaxes de fibrocemento da rede de abastecemento.
O Concello de Neda procederá durante esta fin de semana á colocación de vallas de obra e carteis informativos na área de aplicación das restricións.
