Veciñanza e visitantes deberán descubri-las caramiñas ou recunchos do Nadal repartidos polo núcleo urbano da Pobra do Caramiñal se queren optar aos 200 euros diarios que sorteará o Concello en formato de vale/caramiñas para trocar nos comercios e negocios locais adheridos, ademais da viaxe familiar a Eurodisney para catro persoas que patrocina a empresa Congalsa. Os detalles foron debullados pola concelleira da Promoción Económica, Amparo Cerecedo, e a directora das relacións externas de Congalsa, Isabel Cañas.
Trátase dunha iniciativa máis que impulsa a Concellaría da Promoción Económica ao abeiro da campaña Consegue Caramiñas, Comparte Nadal para a dinamización económica e social do municipio por estas datas.
Esta acción oriéntase ás redes sociais e comprende o período do 3 decembro ao 5 de xaneiro. Consistirá en sacar fotos nos photocall coñecidos como recunchos do Nadal e comparti-las no apartado de historias de Instagram mencionando a conta @caraminhasnapobra. Estes espazos habilitaranse onda o parque do Castelo, na praza de Galicia, praza de Irmáns Axeitos, parque de Raquel Fernández Soler e no Fogar de Nadal.
Dunha banda, sortearanse diariamente 200 euros en caramiñas entre os días 3 e 31 de decembro. Cada xoves darase a coñece-los nomes das persoas gañadoras que participaron dende a semana anterior, agás na última semana do mes de decembro, pois as afortunadas dos días 29, 30 e 31 comunicaranse no 2 de xaneiro.
Os vales de compra poderán recollerse cada sábado no Fogar do Nadal que se disporá na oficina de turismo, situada na Casa Mariñeira, en horario de 10.00 a 13.00 horas.
E ata o 5 de xaneiro existe a posibilidade de gaña-la viaxe a Eurodisney entre tódalas instantáneas tomadas dende o inicio da actividade.
