A concelleira Yoya Neira presentou o encontro, que reunirá no Parrote a entidades vinculadas á defensa dos dereitos das persoas con diversidade funcional de toda Galicia
A concelleira da Área de Benestar Social, Yoya Neira, presentou esta mañá no Palacio de María Pita a oitava edición de ‘Baixo o mesmo paraugas’, o evento que reunirá a entidades sociais na defensa dos dereitos das persoas con diversidade funcional de toda Galicia o vindeiro domingo 3 de decembro ás 12.00 horas na explanada do Parrote. A concelleira estivo acompañada por Ricardo Iglesias, xerente de ASPACE, en representación das 33 entidades que participarán neste acto festivo e reivindicativo.
“É o oitavo ano que levamos a cabo esta paraugada e, aínda que avanzamos en moitos aspectos, os dous principais problemas das persoas con discapacidade seguen sendo os mesmos: a escolarización dos/as menores e o emprego”, sinalou Neira. A concelleira subliñou a necesidade de que as e os menores con diversidade funcional teñan á súa disposición nos centros escolares non só profesorado específico que atenda a súa formación académica, senón tamén persoal que atenda outras necesidades como os cambios de roupa, o comedor ou outras circunstancias, e reclamoulle máis medios á Xunta de Galicia como Administración competente.
Con respecto ao emprego, Neira subliñou o compromiso do Goberno que dirixe Inés Rey coa empregabilidade das persoas con discapacidade a través de distintos convenios con entidades da cidade e dos que saíron experiencias tan positivas como o Quiosco Down ou os Cabaliños de Méndez Núñez. “O valor destes proxectos vai máis aló de conseguir empregos para o colectivo de persoas con diversidade funcional, é tamén unha aposta pola visibilización destas persoas en traballos cara ao público e de gran repercusión na cidade”, dixo.
Pola súa banda, o xerente de Aspace animou a toda a cidadanía a sumarse ao acto do próximo domingo e a participar tamén a través das redes sociais enviando un vídeo cun paraugas e unha mensaxe de apoio ás persoas con discapacidade.
Listaxe de entidades que participarán o domingo:
1. ACEM
2. ASPRONAGA
3. PASCUAL VEIGA
4. ASPABER
5. ARTEFÍOS
6. ASPAYM GALICIA
7. FEAFES GALICIA
8. ADACECO
9. ASPANAES
10. ASPADISOL
11. GRUMICO
12. ONCE
13. ASPACE CORUÑA
14. REDE DE FIBROMIALGIA
15. PREDIF GALICIA
16. APEM
17. ASOCIACIÓN PARKINSON GALICIA-CORUÑA
18. ASPADEX
19. FEGEREC
20. AFACO
21. DISMACOR
22. PAI MENNI
23. ASPESOR
24. DOWN CORUÑA
25. ASPERGA
26. FUNDACIÓN ADCOR
27. AIND
28. ASEM
29. XOGA
30. ENKI
31. ALOUMIÑOS
32. FUNDACIÓN ASPACE CORUÑA
33. OCIO INCLUSIVO OLEIROS
