Esta intervención dá continuidade ao abano de melloras promovidas recentemente no distrito polo Goberno de Inés Rey. Entre elas, unha nova área de calistenia e a posta en servizo dunha base de BiciCoruña
O Concello da Coruña rematou esta semana os traballos para mellorar a accesibilidade peonil no treito que conecta o sector norte da avenida de Monelos coa rolda Camilo José Cela, na contorna do Barrio das Flores.
A intervención, promovida pola Concellaría de Economía e Planificación Urbana a través do servizo municipal de Infraestruturas, centrouse na beirarrúa que une as rúas Papoulas e Azucenas, onde se acometeu a renovación integral dos espazos de paso para os peóns. En primeira instancia, levouse a cabo a demolición do antigo firme nos accesos aos pasos peonís, onde se dispuxeron lousas podotáctis nos accesos desde as rúas Papoulas, Lirios e Camelias cara á avenida de Monelos e a rolda Camilo José Cela.
Xa a continuación, na segunda fase da intervención, o Concello instalou novas varandas metálicas entre a beirarrúa e os espazos verdes lindeiros aos bloques de edificios deste treito, co obxectivo de reforzar a accesibilidade das veciñas e veciños, así como a seguridade peonil.
A maiores, tamén se executaron melloras na marquesiña de bus urbano situada ao inicio da rolda Camilo José Cela, na beirarrúa dereita en sentido de entrada. Ademais, procedeuse á substitución do antigo mobiliario urbano. A este respecto, no treito inicial de Camilo José Cela tamén se habilitou una pequena área de lecer con novos bancos e arboredo, que se executou ampliando lixeiramente o treito de beirarrúa, a modo de saínte.
As melloras no Barrio das Flores: medidas inmediatas e tamén a futuro
Ao longo deste ano, o Goberno de Inés Rey incidiu no plan de melloras urbanísticas previstas no Barrio das Flores, que inclúe medidas a curto, medio e longo prazo.
En primeiro lugar, a finais de xuño licitáronse os traballos para construír a nova rede de saneamento no sector noroeste do barrio. Concretamente, entre a parte baixa da rolda Camilo José Cela e a avenida Salvador de Madariaga, unha intervención ideada para osixenar, ampliar e renovar o circuíto de augas residuais e pluviais na contorna.
Xa posteriormente, en xullo, habilitouse a primeira área deportiva de calistenia no barrio, situada na contorna do pavillón polideportivo municipal.
A continuación, a mediados de setembro, o Concello completou os traballos de instalación e activación da primeira base do servizo municipal BiciCoruña no Barrio das Flores, localizada na praza dos Freixos.
E por último, tamén en setembro, o Concello da Coruña licitou unha intervención financiada con fondos Next Generation: as obras para mellorar a accesibilidade na rúa Castiñeiros, que contempla a creación dun novo acceso peonil desde a avenida de Monelos. Ademais, neste enclave está previsto dotar dun novo paso ao bloque de vivendas da rúa Margaridas, a través da plataforma superior da rúa Castiñeiros. Nos traballos levarase a cabo un investimento de 206.150,73 euros. Unha vez que se adxudiquen, terán un prazo de execución de tres meses.
