Samaín celebrado no serán deste venres ao abrigo da Casa da Cultura de San Sadurniño. Unha cita que tivo que pospoñerse por mor do temporal da semana pasada e que hoxe ateigou de público o centro cultural para asistir á proposta escénica preparada pola veciñanza, que durante preto dunha hora percorreu os mitos, lendas e personaxes fantásticos da nosa tradición.
A xornada rematou no claustro do Convento do Rosario cun magosto e unha chocolatada popular. O Concello agradece a implicación das preto de cincuenta persoas de todas as idades -na súa maioría pertencentes á Asociación Brío, a O Castelo de Narahío e á agrupación cultural Encrucillada- que participaron na iniciativa coordinada polo director teatral Pepablo Patiño e conducida polo actor Kevin Lorenzo.
Desde as áreas de Cultura e Participación, promotoras deste primeiro Samaín veciñal en San Sadurniño, tamén se avanza a intención de repetir a experiencia o ano que vén, agardando que para daquela o tempo permita levar a cabo o itinerario exterior previsto inicialmente.
