— A través da iniciativa ‘EduFrance’ alumnos de 3º e 4ºde ESO e 1º de Bacharelato participarán nunha estadía nas rexións de Hauts-de-France e Bretagne e viceversa
— A este programa súmase ‘Picasso Mob’, co que mozos de 1º de Bacharelato integraranse en centros da rexión académica Bourgogne-Franche Comté
A Consellería de Cultura, Educación, FP e Universidades pon en marcha EduFrance, unha mobilidade na que 200 estudantes galegos e outros 200 franceses, das rexións académicas Hauts-de-France e Bretagne, participarán este curso neste proxecto de mobilidade. A esta iniciativa, o Goberno galego suma Picasso Mob, un novo programa de intercambio entre alumnado de centros educativos galegos e da rexión académica Bourgogne-Franche Comté no que participarán seis estudantes galegos e outros seis de Francia.
O obxectivo destes intercambios escolares é propiciar o coñecemento mutuo das culturas e linguas de ambos países mediante a asistencia do alumnado a centros educativos e a convivencia en familias doutro país. A estratexia Edulingüe 2030 de Linguas Estranxeiras da Consellería de Cultura, Educación, FP e Universidades promove este tipo de accións como chave para achegar ao alumnado galego a un contexto internacional real, tanto no ámbito académico como no da convivencia diaria.
No caso do programa EduFrance, serán arredor de 200 os alumnos de 3º e 4º de ESO e 1º Bacharelato de 20 centros públicos galegos que participarán nun intercambio cultural e lingüístico con alumnado de centros educativos franceses das rexións académicas Hauts-de-France e Bretagne, ambas no país galo.
Durante o período de intercambio, o alumnado galego participante –entre 10 e 15 escolares por cada centro– deberá asistir ás clases no lycée ou collège que lle fose asignado pola Région Académique correspondente e aloxarase na casa dunha familia francesa, e viceversa no caso da viaxe dos estudantes franceses en Galicia. A estancia do alumnado galego en Francia terá unha duración dun máximo de 10 días naturais e poderá desenvolverse en calquera momento do curso 2023/2024.
Os seis alumnos galegos de 1º de Bacharelato participantes no Picasso Mob proceden dos institutos IES de Arzúa, Canido (Ferrol), de Allariz, Johan Carballeira (Bueu) e de Rodeira (Cangas). Aloxaranse durante catro semanas nun domicilio dun estudantes francés, acudindo a clase ao seu centro de ensino. En réxime de reciprocidade, acollerán no seu domicilio e no seu centro de estudos o alumnado francés.
A relación de centros que participarán nestas dúas experiencias, cos gastos de viaxe cubertos pola Xunta, é a reflectida na seguinte táboa :
| Provincia | Concello | Centro | Rexión Académica |
| Coruña, A | Arzúa | IES de Arzúa | Bourgogne-Franche Comté |
| Coruña, A | Brión | IES Brión | Hauts-de-France |
| Coruña, A | Coruña, A | IES A Sardiñeira | Bretagne |
| Coruña, A | Ferrol | IES Canido | Bourgogne-Franche Comté |
| Coruña, A | Malpica | IES Urbano Lugrís | Hauts-de-France |
| Lugo | Burela | IES Monte Castelo | Hauts-de-France |
| Lugo | Fonsagrada, A | IES Plurilingüe Fontem Albei | Bretagne |
| Lugo | Foz | IES de Foz | Hauts-de-France |
| Lugo | Monforte de Lemos | IES Francisco Daviña Rey | Hauts-de-France |
| Lugo | Ribadeo | IES de Ribadeo Dionisio Gamallo | Bretagne |
| Ourense | Allariz | IES de Allariz | Bourgogne-Franche Comté |
| Ourense | Ourense | IES Universidade Laboral | Bretagne |
| Ourense | Ourense | IES Ramón Otero Pedrayo | Bretagne |
| Ourense | Viana do Bolo | IES Carlos Casares | Bretagne |
| Pontevedra | Bueu | IES Johan Carballeira | Bourgogne-Franche Comté |
| Pontevedra | Cangas | IES de Rodeira | Bourgogne-Franche Comté |
| Pontevedra | Estrada, A | IES Manuel García Barros | Hauts-de-France |
| Pontevedra | Gondomar | IES Plurilingüe Terra de Turonio | Bretagne |
| Pontevedra | Meis | CPI de Mosteiro-Meis | Hauts-de-France |
| Pontevedra | Nigrán | IES Val Miñor | Bretagne |
| Pontevedra | Pontevedra | IES Gonzalo Torrente Ballester | Bretagne |
| Pontevedra | Pontevedra | IES A Xunqueira II | Hauts-de-France |
| Pontevedra | Tomiño | IES Antón Alonso Ríos | Hauts-de-France |
| Pontevedra | Vilagarcía de Arousa | IES O Carril | Bretagne |
| Pontevedra | Vilagarcía de Arousa | IES Castro Alobre | Hauts-de-France |
