Máis de cincuenta domicilios participan, sen coste algún, desta iniciativa desenvolvida conxuntamente con SOGAMA
Os máis de cincuenta veciños e veciñas que se inscribriron no programa de compostaxe desenvolvido conxunta e gratuitamente polo Concello de Ordes e a Sociedade Galega do Medio Ambiente (SOGAMA) xa teñen os seus composteiros. Cada un deles acudiu á casa da cultura a recoller o seu, momento que se aproveitou tamén para impartir unha sesión informativa de cómo realizar correctamente o compost.
Celso Moreiras, responsable da empresa Todo verde, encargada da asistencia técnica dos programas de compostaxe levados a cabo por SOGAMA, foi o encargado de explicar qué produtos e residuos se poden empregar neste labor, as propiedades que ofrece como aboamento, así como os erros máis habituais na súa elaboración. Tamén se explicou a correcta instalación do dito composteiro ademais de entregarse un manual explicativo e con consellos útiles. Aínda así tamén se contestaron todas as dúbidas que o público asistente formulou.
No acto de entrega do material tamén estiveron presentes Ana Soneira, concelleira de Medio Ambiente do Concello de Ordes, acompañada dos edís de Mantemento e Asociacións, así como polo alcalde José Luis Martínez Sanjurjo.
Revisións periódicas
A partir de agora todos os participantes desta iniciativa medioambiental terán á súa disposición persoal do Concello para realizar revisións posteriores de cara a asesorar e mellorar o proceso de elaboración e tirarlle o máximo beneficio. Ben coñecido é por todas e todos as propiedades do compost natural para usos agrícolas e labores de fertilización.
Con esta iniciativa preténdese, por un lado, ofrecer coñecementos que permitan á poboación poñer en práctica hábitos sustentables, á par que se consegue reducir a produción de lixo e se incentiva un estilo de vida sostible e compatible co medio ambiente.
