A actuación, que suporá un investimento de 149.000 euros, será financiada con cargo ao orzamento municipal do 2024
Unha vintena de persoas participaron na xuntanza do Consello Parroquial de Artes, na que se presentou o proxecto das obras de acondicionamento do campo da festa. A proposta, que suporá un investimento de 149.000 euros, inclúe a pavimentación do espazo para crear unha gran praza pública que poderá utilizarse tanto para a celebración de eventos como para aparcadoiro. A parte central será pavimentada con formigón, mentres que toda a zona frontal e o perímetro da igrexa irán de pedra, poñendo en valor o conxunto arquitectónico. Tamén están previstas zonas verdes a modo de peche da praza, e xa se prevé a inclusión do parque infantil, que se colocará este mesmo ano. O documento, elaborado en función das necesidades expresadas pola parroquia, quedou a disposición da veciñanza para posibles achegas.
A nivel de equipamentos públicos, unha vez encarrilada a solución á gran prioridade, que era o arranxo do campo da festa, a veciñanza volveu comentar no consello parroquial a posibilidade de acadar algún tipo de acordo co Arzobispado para a cesión da antiga casa reitoral coa finalidade de destinala a un uso social. Esa opción xa fora estudada sen éxito anos atrás, pero por parte da veciñanza realizarase un novo intento. Tamén pediron un soportal para o centro social.
En materia de infraestruturas deuse conta por parte do alcalde, Evencio Ferrero, e dos concelleiros de Obras, Luis Lamas, e Participación Veciñal, Daniel Pérez, do estado das obras de pavimentación da estrada de Bolón (Sofán) a Vilar de Francos (Artes), que ademais de regular o ancho da vía e do aglomerado, inclúe a instalación de 1.300 metros de tubaxes para o abastecemento de auga aos núcleos de Bolón, A Pontenova, A Calzada e Vilar de Francos, cun orzamento de 225.140 euros.
As grandes demandas, de feito, céntranse agora nos servizos de auga, que tras esta actuación e o remate das obras en marcha ata a Baixa de Sofán, deixaría pendente desde O Almacén cara a zona alta; mentres que no que se refire a saneamento está máis avanzado e quedan só algúns núcleos.
Con respecto á rede viaria, o concelleiro Luis Lamas apuntou que están en marcha os traballos de asfaltado e bacheo en todas as parroquias, e que na de Artes localizáronse 18 treitos nos que é preciso intervir. A veciñanza centra as súas peticións na estrada provincial 1903, que desde o Concello xa foron trasladadas á Deputación da Coruña, e na instalación de redutores de velocidade en varios puntos.
Cuestións relacionadas co servizo de recollida de lixo, a limpeza de arquetas ou arranxos varios completaron a xuntanza.
